Daniel 2

Iatonna taun ma’penduan kaparentanna Nebukadnezar, ma’tindomi tu Nebukadnezar; napomagiangmi penaanna tu tindo iato, anna tang mamma’mo.

Mesuami tu datu untambai mintu’ to paissan-issan sia to ma’basa-basa sia to unnampui balik mata sia to Kasdim, la ussembanganni tu tindona datu; saemi tu tau iato mennolo dio olona datu.

Ma’kadami tu datu lako tau iato mai, nakua: Mangkamo’ ma’tindo sia magiangmo penaangku la morai untandai.

Ma’kadami tu to Kasdim lako datu (ma’basa Arami), nakua: Namasakkemora tu datu sae lakona! pokadanni taummi tu tindo iato, angki sembangi.

Mebalimi tu datu lako to Kasdim nakua: Manda’mo kupamanassa lan penaangku, iake tae’i mipokadanna’ tu tindo iato situang sembangna, manassa la dita’tak-ta’takkomi sia iatu banuammi la disanggang anna daun lauan.

Apa iake mipokadai tu tindo iato situang sembangna, manassa la mitarima tu pamengan sia pa’kamasean sia kadipangkeran kapua dio mai kaleku; iamoto pokadammo’ tu tindo iato situang sembangna.

Mebali pole’omi tu tau iato mai nakua: Melo ke napokadai datu lako te taummi tu tindo iato, angki pokadai tu sembangna.

Mebalimi tu datu nakua: Kutandai tonganmo, kumua undaka’ bangrokomi lalan umpadapai tu iannato, belanna miissan, kumua manda’mo kupamanassa lan penaangku.

Kumua, iake tae’i mibela umpokadanna’ tu tindo iato, iatu ukungammi sangrupari, apa pada situru’mokomi la umpokadanna’ tu apa mo’rang sia buttok, sae lako tileluk senga’ tu apa iato. Pokadammo’ totemo tu tindo iato, angku issanni, kumua mibela sia ussembangi.

Mebalimi tu to Kasdim lako datu nakua: Tae’ misa’ tau dao kuli’na padang umbelai napokada tu apa natuntun datu, iamoto tae’ duka misa’ datu, moi nakapua sia makuasa untuntunni tu apa susite lako misa’ to paissan-issan, ba’tu to ma’basa-basa, ba’tu to Kasdim.

Iatu apa natuntun datu, lendu’ ia magasanna, sia moi misa’ tau senga’ tae’ umbelai umpokadanni datu, sangadinna ke iatu mintu’ deata, tu tang torro sola tolino.

Tete dio tu iannato napobannangi sengke tongan tu datu sia re’dek ara’na, anna mesua umpatei tu mintu’ to paissan dio Babel.

Iatonna tassu’mo tu parenta iato, kumua la dipatei tu mintu’ to paissan, nadaka’mi tau tu Daniel sola to nasolan la napatei.

Mennolomi tu Daniel situang kamanaranganna sia ma’sipa’ melo lako Ariokh, pangulu to ma’kampana datu, tu tassu’mo la umpatei tu mintu’ to paissan dio Babel.

Ma’kadami lako Ariokh, to makuasanna datu, nakua: Ma’apari anna patassu’ri datu tu parenta makarra’ susito? Napokadami Ariokh tu iannato lako Daniel.

Malemi tu Daniel umpalakui lako datu, anna dampapi kumua naia umpokadai lako datu tu sembangna tindo iato.

Sulemi tu Daniel lako banuanna umpokadanni solana, iamotu Hananya, Misael na Azarya te iannate,

anna ma’kada kumua la umpalaku kamamasean lako Puang Matua dao suruga diona te rasia iate, kumua na iatu Daniel sola to nasolan da nadipatei sola to paissan torronapa dio Babel.

Attu iato dipaombo’mi lako Daniel tu rasia iato lan patiro mendeata tonna ibongi, anna pudi-pudi Daniel tu Puang Matua dao suruga.

Umpakendekmi pa’pudi-pudian tu Daniel, nama’kada nakua: Mintu’ kadipudian lu lako sanganNa Puang Matua tempon dio mai landa’ lako attu situran, belanna Ia unnampui kakinaan sia kamatotoran.

Ia duka umpopembali pentaunan sia attu. Ia untassu’i datu, Ia duka unnangka’i, Ia duka ungkamasei kakinaan tu to kinaa sia kapaissanan tu to paissan.

Ia umpaombo’i tu apa tang dilambi’ la diissan sia apa kabunian, Naissan duka tu apa lan malillinna sia siayoka kamasiangan.

Kamu, o Kapenombanna nene’ to doloku, tu kupudi sia kupakala’bi’, belanna mangkamoKomi ungkamaseina’ kakinaan sia kamatotoran, sia Mipokadammo’ totemo tu apa kipalaku lako Kalemi, belanna Mipaombo’mo lako kaleki tu diona a’ganna datu.

Iamoto malemi tu Daniel lako Ariokh, tu mangka nasua datu la umpatei to paissan dio Babel; malemi anna ma’kada lako nakua: Da mipatei tu mintu’ to paissan dio Babel, solanna’ umpennoloi datu, angku pokadanni datu tu sembang tindona.

Tikarami nasolan Ariokh tu Daniel umpennoloi datu, anna ma’kada lako nakua: Unnappa’mo’ misa’ muane dio lu mintu’ to Yehuda dipali’, iamo la umpokadai tu sembang tindona datu.

Ma’kadami tu datu lako Daniel, tu diganti Beltsazar, nakua: Ma’dinrokoka umpokadanna’ tu tindo mangka kutiro sola sembangna?

Mebalimi tu Daniel lako datu nakua: Iatu rasia napekutanan datu moi misa’ to paissan, to ma’basa-basa, to paissan-issan ba’tu to pakita-kita, tae’ nabelai umpokadanni datu.

Apa den misa’ Kapenomban dao suruga, tu umpaombo’ mintu’ rasia. Iamo umpamanassai lako datu Nebukadnezar tu apa la dadi allo undi. Inde sia tu tindomi sia mintu’ patiro mendeatammi, tu bu’tu dio pentiromi dao katindoammi.

Iatu kamu, o datu, tommi mamma’ dao katindoammi, bu’tumi tu tangnga’ lan penaammi diona tu apa la dadi undinna; na Ia tu umpaombo’ mintu’ rasia, Ia dukamo tu mangka umpamanassai lako kalemi tu apa la dadi undinna.

Iatu aku te, tae’ to kumua den kamanarangan losong lan kaleku na iatu mintu’ to tuo, anna dipaombo’ lako kaleku te rasia iate, sangadinna iari tu sembangna dipamanassan datu, ammi issanni tu mintu’ tangnga’ penaammi.

Iatu kamu, o datu, mitiromo tu misa’ patiro mendeata, mitiro den misa’ rapang-rapang kapua! Rapang-rapang iato malangka’ sia lendu’ tongan pandillakna; bendan dio olomi, sia lendu’ ia mentakuranna untiroi.

Iatu ulunna rapang-rapang iato bulaan massang, iatu dadanna sia takia’na salaka, na iatu tambukna sia pupunna tambaga,

iatu bi’ti’na bassi na iatu lentekna sisese bassi na losso’ pitti’.

Iatommi marassan ummanta-mantai, pakalan melolinmi tu misa’ batu tang natumbu limanna tau, anna ruai tu lentek rapang-rapang iato, tu bassi sirau losso’ pitti’, anna nisak-nisakki.

Attu iato sangmanisakammi tu bassi na losso’ pitti’ sia tambaga sia salaka sia bulaan, susito ta’pian dio to’ panglulluran, ke pealloanni, napasisarombonan angin, naurungan moi sidi’ tae’mo tinampe len; apa iatu batu tu unnisak-nisakki tu rapang-rapang iato, mendadimo misa’ buntu kapua, ussamboi mintu’ kuli’na padang.

Iamote tu tindo, na iatu sembangna la kipokadan datu.

Kamumo, o datu, datunna mintu’ datu, tu Nakamaseimo Puang Matua dao suruga kadatuan sia kuasa sia kamatotoran sia kamala’biran,

ondongpi tu mintu’ ma’rupa tau, tu umba-umba nanii torro sia mintu’ olo’-olo’ dao kapadanganna sia mintu’ manuk-manuk dao lu langi’. Nasorong nasangmo tama limammi sia Napadadikomi la umparentai tu mintu’nato, – kamumo tu ulunna, bulaan iato.

Undinna nakamu la bu’tu misa’ kadatuan senga’, tu tae’ napada kamala’birammi; namane misa’ kadatuan senga’ pole’o, iamotu ma’pentallunna, tu tambaga, iamoto tu la umparenta mintu’ lino.

Na iatu kadatuan ma’penna’pa’na la makarra’ susito bassi; susito bassi untesse sia unnisak-nisakki tu mintu’ apa; sia susito bassi umpoka-poka mintu’ apa, iatu kadatuan iato la untesse sia la unnisak-nisakki tu mintu’ kadatuan iato.

Iatu lentek sia taruno lentek mitiro sangsesena losso’ pitti’ ditampa kurin sangsesena bassi, battuananna to: iate kadatuan la titaa; na lan to den tu susi makarra’na bassi, susitu bassi mitiro sirau losso’ pitti’.

Na iatu taruno lentek sangsesena bassi na sangsesena losso’ pitti’, kadatuan iato sangsese la makarra’ na sangsese marapo.

Iatu bassi sirau losso’ pitti’ mitiro, battuananna, kumua tau iato mai la sirau tete dio rampanan kapa’, apa tae’ anna belai sangkombong susi bassi tae’ nabelai sirau losso’ pitti’.

Lan attunna mintu’ datu iato la Napabendan Puang Matua dao suruga tu misa’ kadatuan tang la sanggang len sae lakona sia iatu parentana kadatuan iato tang la lele len lako bangsa senga’: iamo la unnisak-nisakki sia la umputtai tu mintu’ kadatuan dipokada undinna, apa ia manna ia la marendeng sae lakona,

susitu mitiro tongan, misa’ batu, tang natumbu limanna tau, melolin dao mai buntu, anna nisak-nisakki tu bassi, tambaga, losso’ pitti’, salaka sia bulaan. PUANG Matua pasareongan mangka umpaissanni datu tu apa la dadi undi; tongannamo tu tindo sia tang balle tu sembangna.

Attu iato lumbangmi sae rokko padang tu datu Nebukadnezar sia umpenombai Daniel; sia mesua duka umpennoloanni pemala’ sia dupa.

Mebalimi tu datu lako Daniel nakua: Tonganna iatu Kapenombammu, Iamo Puang Matua undaoanni mintu’ deata sia Puangna mintu’ datu, sia Iamo umpaombo’i tu mai rasia: iamoto mubelai umpaombo’i te rasia iate.

Iamoto napamatandemi datu tu Daniel, nakamasei ba’tu sangapa-apa pamengan kapua, anna angka’i dadi to ma’parenta lan mintu’ propinsi Babel sia pangulunna mintu’ to paissan dio Babel.

Napalalomi datu tu palakunna Daniel, anna dipatanggungi tu kaparentan dio propinsi Babel lako Sadrakh, Mesakh sia Abednego, na iatu Daniel tontong lan tongkonan layukna datu.