Hakim-hakim 10
Iatonna matemo tu Abimelekh, bendanomi tu Tola, anakna Pua, anakna Dodo, misa’ to dio mai Isakhar, la urrampanan to Israel. Torromi dio Samir dao buntunna Efraim.
Naparentami tu to Israel duangpulo ntallu taunna; matemi anna dilamun dio Samir.
Undinnato bendanomi tu Yair, to Gilead, anna umparenta to Israel duangpulo ndua taunna.
Iatu anakna muane den tallungpulo, ussakei keledai laki tallungpulo sia unnampui tu tallungpulo tondok, tu disangai sae lako allo iate kampongna Hawot-Yair lan lili’na Gilead.
Matemi tu Yair anna dilamun dio Kamon.
Napogau’ pole’omi to Israel tu apa kadake dio pentiroNa PUANG; umpenombai tu mintu’ Baal sia Astoret sia kapenombanna Aram, Sidon sia Moab, sia kapenombanna to Amon sia to Filistin, apa iatu PUANG naboko’imo sia tae’mo napengkaolai.
Iamoto anna re’dek ara’Na tu PUANG lako to Israel, Nasorongi tu tau iato tama kuasanna to Filistin sia to Amon.
Lan duka tu taun iato dinii umpandasai sia umpakario-rioi tu to Israel sia lan sangpulo karua taunna dinii umpandasai tu mintu’ to Israel sambalinna lu Yordan, lan tondok to Amori lan lili’na Gilead.
Ondongpi iatu mintu’ to Amon ullambannimo Yordan la urrarii to Yehuda, to Benyamin sia to Efraim, naurunganni lendu’mo pussakna tu to Israel.
Attu iato metambami tu mintu’ to Israel langngan PUANG, nakua: Kasalammokan lako Kalemi, belanna kiboko’imo tu Kapenombangki sia kipenombaimo tu mintu’ Baal.
Apa ma’kada tu PUANG lako mintu’ to Israel, Nakua: Tangiaraka Aku tu mangka urrampanangkomi lan mai kuasanna to Mesir, to Amori, to Amon, to Filistin,
to Sidon, to Amalek sia to Maon, tonna pakario-riokomi, ammi metamba lako Kaleku?
Apa moi susito mitampe dukaNa’ sia menombamokomi lako kapenomban senga’; iamoto tae’mo Kula urrampanangkomi.
Malemokomi ammi metamba lako tu mintu’ deata mipilei, na iamora urrampanangkomi lan mai kapussakammi.
Ma’kadami tu to Israel lako PUANG, nakua: Umpogau’mokan kasalan. Pogau’ bangmi lako kaleki tu Misanganna melo, podo Mirampanangkan te allo iate!
Iatu rapang-rapang dipodeata dio lu tau iato mai natibemo, anna umpengkaolai PUANG; attu iato tang masemo penaanNa Puang untiroi tu kamandasanna to Israel.
Ditambaimi sirampun tu to Amon anna ma’tenda dio Gilead; iatu to Israel sirampun anna ma’tenda dio Mizpa.
Sikutanami tu tau, iamotu mai arungna to Gilead, nakua: Mindara tu muane la umpangului kasirarian unnea to Amon? Iamo la dadi pangulunna mintu’ to umpa’tondokki Gilead.