Hakim-hakim 9

Malemi tu Abimelekh, anakna Yerubaal, lako Sikhem umpessitammui mintu’ siulu’na indo’na, anna ma’kada lako tau iato mai sia lako mintu’ sangdadian pa’rapuanna indo’na, nakua:

Palanda’i tama pa’peranginna mintu’ to umpa’tondokki Sikhem kumua: Umbara misanga melo, ke naparentakomi tau pitungpulo muane, mintu’ anakna muane Yerubaal, na iake to misa’ri umparentakomi? Sia la mikilalai kumua to sangrara sangbukuki’.

Napalanda’mi siulu’na indo’na te mintu’na te tu diona a’ganna tama pa’peranginna mintu’ to umpa’tondokki Sikhem, anna ma’mirringan lako Abimelekh, belanna nakua: To siulu’ siaki’.

Nabenmi pitungpulo sikele’ salaka lan mai banua kabusunganna Baal-Berit, napassaroanni Abimelekh tu doi’ iato lako ba’tu pira-pira passolle’ sa’ga’, anna turu’i.

Iatonna rampo lako to’ banuanna ambe’na dio Ofra, napateimi tu mai siulu’na, anakna muane Yerubaal, pitungpulo dao misa’ batu. Apa iatu Yotam, anak tampakna Yerubaal, tuo siapa, belanna umpembunian kalena.

Attu iato sirampunmi tu mintu’ pa’tondokan Sikhem sia mintu’ to lan Bet-Milo, anna male unnangka’i datu tu Abimelekh, dio to’ tarpin sikandappi’ batu kapengkilalan dio Sikhem.

Napokadami tau lako Yotam tu iannato, iamoto anna male nabendan dao botto buntu Gerizim sia metamba umpekapuai gamaranna lako to Sikhem nakua: Perangiina’, mintu’ to umpa’tondokki Sikhem, anNa perangii dukakomi Puang Matua.

Den pissan iatu mintu’ garonto’ kayu male untokkoan kalena misa’ datu, anna ma’kada lako garonto’ saitun, nakua: Kamumo tu la undatuikanni.

Apa mebali tu garonto’ saitun nakua: Ma’apai angku la untampe lompoku, tu Napudi Puang Matua sia mintu’ to lino diona a’gangku, angku la male mempoyang dao lu mintu’ lolokna kayu?

Ma’kadaomi tu mintu’ garonto’ kayu lako garonto’ ara, nakua: Kamumo la undatuikanni.

Apa mebali tu garonto’ ara nakua: Ma’apai angku la untampei tu matanningku sia mintu’ bua me’lokku angku la male mempoyang dao lu mintu’ lolok kayu?

Ma’kadaomi tu mintu’ garonto’ kayu lako garonto’ anggoro’, nakua: Kamumo la undatuikanni.

Apa mebali tu garonto’ anggoro’, nakua: Ma’apai angku la utampei tu uai matappa’ku, tu Napoparannu Puang Matua sia mintu’ to lino, angku la male mempoyang dao lu mintu’ lolok kayu?

Ma’kadaomi tu mintu’ garonto’ kayu lako oto’ duri, nakua: Kamumo la undatuikanni.

Mebalimi tu oto’ duri, nakua: Iake tonganni aku la mitokko datummi, malemokomi mai sola nasang mentirerung diong onganku; apa iake tae’i nasusito, nake sunni tu api lan mai to’ duri ungkande nasangi tu mintu’ garonto’ arasi’ dao Libanon.

Iake tongannakomi ma’bulo lollong sia ma’gau’ lambu’ unnangka’i datu tu Abimelekh, sia iake umpogau’komi kameloan lako Yerubaal sia bati’na, sia mipapakkanni sitinaya penggauranna;

belanna iatu ambe’ku male umparariangkomi, naeloran tu sunga’na la urrampanangkomi dio mai kuasanna to Midian.

Apa iate kamu totemo pabali-balimokomi lako bati’na ambe’ku sia mipatei tu mintu’ anakna muane pitungpulo dao misa’ batu, ammi angka’i tu Abimelekh, anak kaunanna ambe’ku la undatui to Sikhem, belanna siulu’komis-

iake tonganna allo iate ma’bulo lollongkomi sia ma’gau’ lambu’ lako Yerubaal sia bati’na, la mipoparannumo tu Abimelekh sia la napoparannu dukakomi.

Apa iake tae’i nasusito, manassa la sun tu api lan mai Abimelekh, anna pura ungkandei tu pa’tondokan Sikhem sia Bet-Milo, sia la sun tu api lan mai pa’tondokan Sikhem sia Bet-Milo, anna pura ungkandei tu Abimelekh.

Mangkato mallaimi tu Yotam umpallaian kalena lako Beer, anna torro dio, belanna mataku’ lako Abimelekh, siulu’na.

Iatonna ganna’mo tallung taun tu Abimelekh umparenta to Israel,

nasuami Puang Matua tu misa’ penaa kadake umpasipakkai Abimelekh tu pa’tondokan Sikhem, naurunganni tu to Sikhem pabali-balimo lako Abimelekh;

kumua anna dipapakkanni tu pa’pakario-rio, tu diparampo lako pitungpulo anakna muane Yerubaal, iamotu kadipatibolloanna rarana, belanna Napasule Puang langngan botto ulunna Abimelekh, siulu’na, tu mangkamo umpatei sia Napopa’indo’ duka langngan botto ulunna to Sikhem, tu patunduan umpatei siulu’na Abimelekh.

Iatu to Sikhem umpadaomo botto buntu ba’tu pira-pira to mangamu’ la unnea Abimelekh, sia narampa tu apanna minda-minda ullendu’i lalan iato. Naparampomi tau tu iannato lako Abimelekh.

Sae dukami tu Gaal, anakna Ebed, sola tu mai siulu’na, anna male tama Sikhem. Mintu’ to Sikhem urrannuanni.

Malemi tu tau iato mai lako pa’lak, unnala bua anggoro’na, naparrai sia ma’marua’-rua’; namale tama banua kabusunganna deatanna, kumande sia mangiru’ sia unggatai Abimelekh.

Ma’kadami tu Gaal, anakna Ebed, nakua: Mindara tu Abimelekh, na apara tu Sikhem, angki la umpengkaolairi? Tangiaraka anakna muane Yerubaal, tangiaraka Zebul to marayanna? La’biran ke iatu taunna Hemor, ambe’na Sikhem, mipengkaolai, ma’apai anta pengkaolai Abimelekh?

Iake la aku ungkuasai te to buda, manassa la kuula’i tu Abimelekh. Ma’kadami umpatingoi Abimelekh, nakua: Pebudai tu surodadummu, ammu tassu’ tasirari!

Iatonna rangimi Zebul, pangulu kota, tu kadanna Gaal, anakna Ebed, re’dekmi tu ara’na.

Nasuami tu pesua lako Abimelekh dio Aruma, kumua: Manassamo tu Gaal, anakna Ebed, sia siulu’na saemo dio Sikhem, sia kanandaimi, belanna umpakado-kado pa’tondokan la umbalikomi.

Iamoto la ke’de’ bongikomi, la kamu la iatu mai surodadu misolan, mimangamu’ dio lu padang.

Ianna mela’bik, ke la berre’i allo, la ke’de’mokomi ullaoi tu kota. Na iake tassu’i sola tu to nasolan unneakomi, la mipogau’ lako kalena tu apa misanga melo.

Iamoto anna ke’de’ bongi tu Abimelekh sola tu mai surodadu nasolan, anna dipapatang kaponan unnamu’i tu Sikhem.

Iatonna tassu’mo tu Gaal, anakna Ebed, anna bendan dio babangan tondok, simpolo ke’de’mi tu Abimelekh sola surodadunna lan mai inan nanii mangamu’.

Ta’kala natiromi Gaal te surodadu nama’kada lako Zebul nakua: Tiromi, solo’mo tu tau dao mai botto buntu. Apa mebali tu Zebul lako nakua: Mitiro tu bayo-bayo buntu misangami tau.

Apa ma’kada pole’ tu Gaal nakua: Manassa solo’mo tu tau dao mai buntu Posi’ Tana sia misa’ kaponan unnolai lalan dio mai Kayu tarpin tu nanii to pakita-kita.

Attu iato ma’kadami tu Zebul lako, nakua: Umbamira totemo tu kada layukmu susite, kumua: Minda toda tu Abimelekh anta la umpengkaolairi? Tangiaraka tau iate tu mupamatuna? Tassu’moko totemo ammu sirari.

Tassu’mi tu Gaal dio pentirona pa’tondokan Sikhem, anna sirari Abimelekh.

Iatonna male mallai, undimi Abimelekh unnula’i, anna buda tau tibambang mate sae lako to’ babangan.

Torromi tu Abimelekh dio Aruma, anna rambai Zebul tu Gaal sola mintu’ siulu’na, naurungan tae’ nama’din torro lan Sikhem.

Iatonna masiang to tassu’mi lako padang tu to buda. Malemi tu tau umpokadanni Abimelekh.

Naalami tu mintu’ surodadunna, napatallung kaponanni, anna mangamu’ dio lu padang. Iatonna tiromi kumua tassu’mo tu to buda lan mai kota, malemi ullaoi, anna taloi tu tau iato.

Tarru’ male tu Abimelekh sola tu kaponan surodadu nasolan, naalami tu babangan kota, na iatu kaponan senga’ duang torroan ullaoi mintu’ to dio lu padang sia napatei.

Situ’turan allo nanii Abimelekh urrarii tu kota iato, natalomi tu kota iato, napatei tu pa’tondokan, mangkato nasanggangmi tu kota iato sia nasambo’i sia.

Iatonna rangimi mintu’ to umpa’tondokki Menara-Sikhem tu iannato, malemi tama lo’ko’ diong tu nanii banua kabusunganna El-Berit.

Naparampomi tau lako Abimelekh kumua iatu mintu’ pa’tondokanna Menara-Sikhem dio nasangmo sirampun.

Kendekmi tu Abimelekh sola mintu’ surodadunna langngan buntu Zalmon; nabaami Abimelekh tu misa’ uase, natotoi tu tangke kayu, naangka’i anna passanni, nama’kada lako to nasolan nakua: Iatu apa mitiro kupogau’, madomi’komi umparundu’i.

Pada natotomi surodadunna tu mintu’ tangke kayu, naundi urrundu’ Abimelekh, napatorromi tu tangke kayu iato dao to’ lo’ko’, namane umballai tu lo’ko’, nanii tau lan. Susimoto tu kamateanna mintu’ to umpa’tondokki Menara-Sikhem, agi-agi sangpulo sa’bu tu muane sola baine.

Mangkato ke’de’omi tu Abimelekh lako Tebes, napatama limbui tu kota iato, nataloi.

Lan tangnga kota iato den misa’ menara matoto’, na iatu mintu’ muane sola baine, iamotu mintu’ pa’tondokanna kota iato, sangmallaian lako, anna salli’i tu ba’bana, na mane kendek tu tau iato mai langngan bubungan marantena menara iato.

Rampomi tu Abimelekh lako to’ menara anna laoi, sia tarru’ liu lako ba’ba menara iato la umballai.

Denmi misa’ baine umpapa’nakki batu pangrissoan daona lu rokko to’ ulunna Abimelekh, natesse tu kararo ulunna.

Natambaimi madomi’ tu taunna tu umbaa pa’bunona, anna ma’kada lako nakua: Nonokki tu pa’dangmu ammu pateina’, da napokadai tau tu diona aku kumua: misa’ baine mangka umpatei. Ta’pa natobokmi taunna, anna mate.

Iatonna tiromi to Israel kumua matemo tu Abimelekh, pantan sulemi tu tau iato lako inanna.

Susimoto tu Puang Matua umpabala’i kakadakeanna Abimelekh, tu napogau’ lako ambe’na umpatei tu siulu’na pitungpulo.

Sia ia duka tu mintu’ kakadakeanna to Sikhem Napasule nasang Puang Matua langngan botto ulunna. Susimoto tu pa’tampak ropunna Yotam, anakna muane Yerubaal dipalanda’ lako tau iato mai.