Mazmur 105

Pa’pudi-pudian lako Puang Matua, belanna mintu’ penggauran kalle-kalleanNa 1

Pudimi tu Puang sia meongli’komi ussa’bu’ sanganNa. Pakaleleanni tu penggauranNa dio lu mintu’ bangsa!

2

PenanianNi sia pakendekanNi pa’pudian; pokadai tu sininna penggauran kalle-kalleanNa!

3

Massattuangkomi diona sanga maseroNa; mintu’ to undaka’ PUANG sipatu la sende batu ba’tengna.

4

Anga’i tu PUANG sia tuntunni tu matoto’Na; la tontongkomi undaka’I ammi pellambi’i oloNa.

5

Kilalai tu mintu’ tanda memangngan mangka Napogau’, sia mintu’ tanda kalle-kalleanNa sia mintu’ panglampakNa tu ombo’ dio randan pudukNa,

6

e mintu’ tarukna Abraham, taunNa, e mintu’ bati’na Yakub, tu Napilei langsa’.

7

Iatu PUANG, Iamo Kapenombanta, sia mintu’ pa’paolainNa salu lalo lan mintu’ lino.

8

Nakilalai sia tu basseNa tontong sae lakona, iamotu kadanNa tu mangka Napepasanan landa’ lako sangsa’bu osso’na.

9

Iamotu basse Nasibassei Abraham, sia sumpaNa lako Ishak.

10

Sia iatu aluk Napondok, Naarra’ lako Yakub la napoaluk, sia lako Israel la napobasse tontong sae lakona,

11

tu nakua kadanNa: La Kutekkenniko tana Kanaan, mana’ diba’giangko.

12

Iatonna tang pira tu tau iato mai, sia sidi’ tonganri sia to sae bangri lan,

13

sia ullelei simisa’ bangsa. sia ke’de’ dio mai parenta senga’ male umpengkara’pai bangsa senga’,

14

tang Naeloran Puang tu misa’ tau la umpandasa tau iato mai, sia Napa’dikki duka tu mai datu diona tau iato mai.

15

Nakua kadanna: Da mirumbui lako tu mati’ to mangka Kutokko, sia da mipogau’ kadakena lako mintu’ nabingKu!

16

Ia untambai ra’pak padang sae lan tondok iato, sia Napaputta tu kande, dipopamuntu.

17

Anna suai dolo tu misa’ tau lako, iamotu Yusuf tu mangka dibalukan mendadi kaunan.

18

Napatamami tau tama sangkala tu lentekna, sia napaluangi rante bassi.

19

Sae lako dadinna tu kadanna sia Natongannimo kadanNa PUANG.

20

Iatu datu ussua tau urrampananni, sia iatu pekapuanganna ba’tu pira-pira bangsa umbukai tu rante bassinna;

21

Naangka’mi datu mendadi to paa lan tongkonan layukna, sia to umpoissan mintu’ barang apanna.

22

Kumua anna rendenni tu mintu’ to paa unturu’ lalan penaanna, sia kumua anna ada’i kakinaan tu mai pekaamberanna.

23

Saemi lako Mesir tu Israel, sia mempue tu Yakub dio padang Ham.

24

Napopemba’ka’ kalle-kallean tongan Puang tu taunNa, sia mandu Napamawatang anna iatu mai balinna.

25

Napasenga’mi Puang tu penaanna tau iato mai, naurunganni ungkabiri’i tu mai taunNa, sia natangnga’ tu mai orangNa.

26

Nasuami tu Musa, taunNa sia Harun to Napilei langsa’.

27

Napogau’mi sola duai dio lu tau iato tu mintu’ tanda kalle-kallean mangka Napokada, sia mintu’ tanda mangnga napogau’ dio lu tana Ham.

28

Napasaemi Puang tu malillin, naurunganni pittuk, apa tae’ anna palanni ara’na tau iato mai tu kadanNa Puang.

29

Napopembali rara tu uainna, anNa patei tu mintu’ balena.

30

Iatu tondokna Nasitutu’i tokko’, sae tama mintu’ bilikna tu mai datunna.

31

Ma’kadami tu Puang anna sae tu tabuan lendu’ budanna, sia kasisi’ ussitutu’i lili’ padangna.

32

Napasae tu uran batu Naposondana uran, sia Napasae tu api ma’lulu-lulu lan padangna.

33

Napasiapananni tu mintu’ garonto’ anggoro’na sia kayu arana, sia Narebong-rebong tu mintu’ kayu lan mintu’ lili’na.

34

Ma’kadami tu Puang anna sae tu batik, sia sae tu pokkamurrung tang dikemba’-kemba’.

35

Tu umpepurai angganna daun kayu lan tondokna, sia ungkande mintu’ tanananna.

36

Sia Napatei siapa tu mintu’ anak pa’bunga’ lan padangna tau iato, tu bunga’ kamatotoranna.

37

AnNa solanni sun tu to Israel umpokinallo salaka sia bulaan, sia dio lu sukunna tae’i misa’ tau titodo len.

38

Sendemi tu to Mesir tonna sunmo tu tau iato mai, belanna narampoi kamatakuran lako tau iato mai, tu to Masir.

39

Naballa’ Puang tu salebu’ la unnonganni tu to Israel, na api la umpemasiangi bongi.

40

Malakumi tu tau iato mai, anNa pasaei Puang tu ba’tu sangapa puyo, sia Napedia’i roti dao mai langi’.

41

Naparassak tu buntu batu anna sun tu uai, tu lolong lako padang marangke butung salu.

42

Belanna nakilalai tu kada maseroNa, sia iatu Abraham, taunNa.

43

Iamoto anNa solanni Puang sun tu taunNa situang kaparannuan, sia mintu’ to Napilei langsa’ Naanta’ sun situang la’tek silelean.

44

Naba’gi tondokna ba’tu pira bangsa tu tau iato mai, anna pomana’i tu kara’tasanna to sangpetayanan.

45

Kumua anna karitutui tau iato mai tu aluk Napondok Puang, sia natoe manda’ tu mintu’ Sukaran alukNa. Haleluya!

alkitab.me