Mazmur 106

Diona kasalanna to Israel sia kamasokananNa Puang Matua 1

Haleluya! Pudimi tu PUANG, belanna masokan Ia, sia iatu kamasokananNa tang tileluk sae lakona.

2

Mindara tu ma’din umpokada nasangi tu penggauran kalle-kalleanNa PUANG. Ba’tu ma’din unggente’-genteranni mintu’ kadipangkeranNa?

3

Maupa’ tu mintu’ to ungkaritutui katonganan, sia tontong umpogau’ malolo.

4

Kilalaina’, o Puang, sitinaya tu kamasorokamMi lako taumMi, sia tollongina’ kasalamaran lu mai Kalemi.

5

Angku belai untiroi tu karongkosanna mintu’ to Mipilei langsa’, sia angku sende paiman sola taumMi lan kaparannuanna, sia massattuan sola tu mai to Mipomana’.

6

Mangkamokan kasalan susito doloki, sia umpogau’mokan kakadakean sia tang mekaalukmokan.

7

Tae’ anna palan ara’i to doloki tu mintu’ penggauran kalle-kalleamMi dio tana Mesir, sia tae’ anna kilalai tu kamasokanan budamMi, sangadinna pabali-bali dio to’ randan tasik, dio tasik Teberau.

8

Apa Nalendokan Puang tete dio sanganNa. Nanii umpa’peissanan kuasanNa,

9

Nasarabai tu tasik Teberau, anna marangke, anNa solanni tu tau iato mai ullamban tasik mandalan butung to unnola rante pama’.

10

Susimoto Nanii Puang ullendokanni dio mai lisu pala’na to ungkabiri’i, sia Nalussuran dio mai kuasanna uali.

11

Mintu’ uai ussamboi nasang ualinna, naurunganni tae’mo misa’ tau tinampe.

12

Maneri nakatappa’i tu kadanNa, sia umpenanianNi pa’pudi-pudian.

13

Apa ta’pa tang nakilalai tau iato mai tu penggauranNa, sia tae’mo anna tayanni tu pa’timbanganNa;

14

sangadinna nakendekki kamaduangan kapua tu tau iato mai dio lu padang aak, naurunganni ussandak Puang Matua dio lu padang talo.

15

Nabenmi tu nakaduanginna tau iato mai, apa Napomaropu tu tau iato mai.

16

Mabiri’mi tu tau iato mai lako Musa dio to’ tenda, sia lako Harun to masero dio oloNa PUANG.

17

Mengangami tu padang anna amma’i tu Datan, sia nasamboi tu mintu’ to nasamaturusan Abiram.

18

Dukkumi ma’lulu-lulu tu api lan to nasamaturusan, anna mampu’i dukkunna tu to tang mekaaluk.

19

Iatu to Israel sola nasangi unggaraga anak sapi dio Horeb, anna penombai tu rapang-rapang dipatiri’.

20

Indemoto nanii tau iato mai ussondai rupa tedong sapi ungkande riu, tu To napomala’bi’.

21

Sia nakalupaimo tu Puang Matua, To ullendokanni, tu mangka umpogau’ apa kapua dio tana Mesir.

22

Iamotu penggauran kalle-kallean dio tana Ham, sia ba’tu pira-pira apa metakuran napogau’ dio randan tasik Teberau.

23

Iamoto anNa ma’kada kumua la Nasabu’i nasang – kenna tang Musa to Napilei langsa’ bendanmo manglapa’ dio oloNa Puang, la untampang sengkeNa Puang, da anNa mangsanni tu tau iato mai.

24

Tang naangga’ tau iato mai tu padang ballo, sia tae’ anna katappa’i tu kadanNa.

25

Sangadinna ma’nuku-nuku sola nasangi lan lu tendana, sia noka umperangii gamaranNa PUANG.

26

Naaakki lima Puang, anna umpalao sumpa, kumua la Napasiapanan tu tau iato mai dio lu padang pangallaran.

27

Sia Napasiapanan tu mai bati’na dio lu to’ bangsa, sia la Napatisambo’-sambo’ lako mintu’ tondok.

28

Mintu’i massola nasang sikadamakmo Baal-Peor, anna kande apa dipemalaran lako apa tang kepenaa.

29

Iamoto nanii umpatiludak kasengkeanNa Puang napobua’ penggauranna, naurunganni ma’kasolang-solang tu parri’ dio lu tau iato mai.

30

Bendanmi tu Pinehas attu iato umbussui kakadakean. Namane radan tu parri’ iato.

31

Iamoto tu dibilang napomalolo landa’ lako disituran-turananni tontong sae lakona.

32

Sia napatiludak tu kasengkeanNa Puang dio to’ uai Meriba, naurunganni urrampoi sussa tu Musa natumang tau iato mai.

33

Belanna pabali-bali sola nasangi lako Penaanna Puang, Napourunganni lendu’ tu kadanna Musa.

34

Tae’ra anna sabu’i tau iato mai tu bangsa iato, susitu mangka Napokadanni PUANG.

35

Sangadinna umpasirau ta’nak to kapere’ kalena, anna peolai tu mintu’ penggauranna.

36

Sia napenombai dukapa tu rapang-rapang dipodeatanna tau iato mai, tu butung poya lako kalena.

37

Ondongpi Napemalaran duka tu mai anakna muane sia baine lako mintu’ deata masussuk.

38

Sia umpatibollo rarana to tang sala, iamotu rarana anakna muane sia anakna baine, tu napemalaran lako mintu’ rapang-rapang dipodeata dio lu tana Kanaan, naurunganni narutai rarana tu tana iato.

39

Susimoto nanii urruttakki tu kalena tete dio gau’na, sia ma’gau’ sala bannang dio penggauranna.

40

Iamo bannangna to anna ma’lulu-lulu tu kasengkeanNa PUANG lako taunNa, sia Nasayu pallan tu to Napomana’;

41

Nasorongmi tu tau iato mai tama lisu pala’na ba’tu pira-pira bangsa, napourungi naparenta to ungkabiri’i.

42

Iatu tau iato mai napakario-riomo mintu’ ualinna, naurungan umpopengkanorongi tama lisu pala’na.

43

Pembuda Narampanan Puang tu tau iato mai, apa pabali-bali unturu’ tanan penaanna, anna urunganni malabu tu tau iato mai nakabu’ kakadakeanna.

44

Moi anna susito, ke Natiroomi tu kamandasanna tau iato mai, sia ke Narangioi tu mai pengkamala’na.

45

Sia belanna diona la napomelona tau iato mai, Nakilalaimi Puang tu basseNa, anNa maturu-turu sitinaya kamasokanan budanNa.

46

Sia Napabu’tu tu kamamasean lako tau iato mai, lan ba’tengna mintu’ to urrampai.

47

O PUANG, Kapenombangki, lendokangkan, sia pasidurukkanni sule lan mai to’ ba’tu pira bangsa, angki pudi sanga maseroMi, sia massattuan lan kadipudiamMi.

48

Mintu’na kadipangkeran lu lako nasang PUANG, Kapenombanna to Israel, tempon dio mai landa’ lako attu situran, sia sipatu mintu’ bangsa iato, la ma’kada kumua: Amin! Haleluya!

alkitab.me