Lu lakona pangala sengo. Unturu’ baenan sengo bunga bakung. Misa’ gelong bangunan ada’na to Korah. Londe pa’kaboro’. (45-2) Tiakka’ tu penaangku la umpokada kada masokan, la ussengoanna’ datu, iatu lilaku susi peoki’na to malute mangoki’.
2
(45-3) Mandu maballokomi kamu anna mintu’ ma’rupa tau, iatu kamabalelean dipasitutu’mo randan pudukmi, iamoto anna pamasakkekomi Puang Matua tontong sae lakona.
3
(45-4) Takinni tu la’bo’mi dio aakmi, e lalong, situang kabarre-alloammi sia kamala’birammi.
4
(45-5) Sangapaoi mimaupa’ dao sakeammi, lao umposara’ kamanapparan, kaumpamadiongan penaa sia katonganan, na lima kananmi la umpatudukomi tu mai masangna.
5
(45-6) Iatu mai tinaranmi mata’tak! – ba’tu pira-pira bangsa mipatunduk – iatu tinaranmi lendu’ tama banua mintu’ ualinna datu.
6
(45-7) Isungan kapayungamMi, o Puang Matua, tontong sae lakona, Sia tekken kamalamburan iamo tekken kapayungammi.
7
(45-8) Mikamali’ tu kamaloloan ammi sayu kakelokan; iamoto, o Puang Matua, anna bolloikomi minna’ Kapenombammi, tanda kasendean, Napalosongkomi na iatu mai solami.
8
(45-9) Mintu’ tamangkalemi situtu’ bau muru sia andelen sia kadinge’; sia lan mai tongkonan layuk dikararak gading naniimo tu mintu’ paningoan diritii umpasendekomi.
9
(45-10) Ba’tu pira-pira tu lai’na datu tu tama mipobaanan sola anak dara baanammi; sia dio kananmi bendan tu datu baine ma’pakean bulaan tasak dio mai Ofir.
10
(45-11) Perangii, e Lai’, kilalai sia patananni talingammi. Paboko’imi penaa tu bangsami sia to lan banuanna mendadiammi.
11
(45-12) Ke naalai penaanna datu tu kamaballoammi, belanna iamo dipopuang, la tukkukomi lako.
12
(45-13) Iatu Lai’na datu Tirus la sae umpennoloan pamenganna, sia iatu mai to la’bi’na mintu’ bangsa malaku la mikasokanni.
13
(45-14) Iatu Lai’na datu iato mala’bi’ tongan lan bilik tongkonan layuk, sia iatu tamangkalena disulan riti bulaan.
14
(45-15) La dipopennolo lako datu situang tamangkalena makkarupa-rupa sulanna, sia mintu’ anak dara sangbara’na, umbaananni la dipopennolo duka lako kalemi.
15
(45-16) Iatu tau iato mai la disolan naturu’ kaparannuan sia arrak, anna tama tongkonan layukna datu.
16
(45-17) Mintu’ tu mai anakmi la ussonda to dolomi, tu la miala ampu lembang lan mintu’ tondok.
17
(45-18) La kupokada tu sangammi anna disiosso’i dianna batu silambi’; iamoto anna mintu’ bangsa la umpudikomi tontong sae lakona.