Mazmur 46

Lu lakona pangala sengo. Misa’ pa’pudianna to Korah. Unturu’ baenan sengo: Anak dara. Misa’ sengo. (46-2) Iatu Puang Matua iamo pentilindungangki, sia oto’na kamatotorangki, misa’ pa’tunduan tongan lan kapussakan.

(46-3) Iamoto anna tae’ angki la mataku’ moi anna tilele te lino, sia moi anna la tiberu tu mintu’ buntu rokko atena tasik.

(46-4) Moi anna mongngo’ sia tikula’dak tu uainna, sia moi anna mintu’ buntu tiseno napobua’ tikula’dakna. Sela Apa Puangna mintu’ ma’dandan maritik urrondongkanni, sia iatu Kapenombanna Yakub iamo kipotambakuku matoto’. Sela

(46-5) Den misa’ salu: iatu salossokna umpopaiman kotaNa Puang Matua, inan mandu maindan naisungi Patodoranna.

(46-6) Tongkon lan tangngana tu Puang Matua, tae’ nala tigega’ len tu tondok iato, iake tibangka’mi masiang la Natundui Puang Matua.

(46-7) Marukka’mi tu mintu’ bangsa sia tigega’ tu mintu’ parenta, sumarabami tu Puang, anna bonno’ tu lino.

(46-8) PUANGna mintu ma’dandan maritik urrondongkanni, sia iatu Kapenombanna Yakub iamo kipotambakuku matoto’. Sela

(46-9) Maimokomi untiroi tu penggauranNa PUANG, tu umpabu’tu kasanggangan lan lino,

(46-10) Napasoro’ ambun tu tananan ra’ landa’ lako randanna langi’, Narebong-rebong tu tinaran, sia Napolo tu doke, sia Natunu api tu mintu’ kareta.

(46-11) Rapa’komi sia issanni kumua Akumo tu Puang Matua; Akumo tu mala’bi’ dio lu mintu’ bangsa, sia mala’bi’ lan lino.

(46-12) PUANGna mintu’ ma’dandan maritik urrondongkanni; sia iatu Kapenombanna Yakub iamo kipotambakuku matoto’. Sela