Ulangan 7
Iake mangkamoko Nasolan PUANG, Kapenombammu, tama tu tondok, tu la munii rampo la muala, mupoapai, sia iake mangkami Naula’i tu mai bangsa buda dio mai tingayomu, iamotu to Het, to Girgasi, to Amori, to Kanaan, to Feris, to Hewi sia to Yebus, den pitu bangsa, tu marapuan sia makuasa na iko;
sia iake Nasorongammoko PUANG, Kapenombammu, tu tau iato mai, ammu taloi, manassa la musabu’i nasang. Da musibasse tau iato sia da mukamasei.
Sia da duka musipoipa’ tu tau iato; iatu anakmu baine da mupakemuanei lako tau iato, sia da mutarimai tu anakna baine napobaine anakmu.
Belanna napatoyang manii tu anakmu muane dio mai Kaleku, anna penombai kapenomban senga’, anna re’dekmo tu ara’Na PUANG ullaoikomi sia madoi’ la ussabu’iko.
Apa la mipogau’ lako kalena susite, iamotu la mirondon tu inan pemalaranna sia la mitesse tu batu dipodeatanna sia la milelleng tu lentong kayu dipodeatanna sia la miballa tu rapang-rapang dipodeata dipa’na.
Belanna ikomo misa’ bangsa, tu masero dio olona PUANG, Kapenombammu; iatu iko Napileimoko PUANG, Kapenombammu, dio mai mintu’ bangsa dao kuli’na padang la Napotau.
Tangia belanna to marapuangkomi na iatu mintu’ bangsa senga’, anNa alakomi penaanNa PUANG sia Natonno’komi, sangadinna iatu kamu bangsa mandu bitti’ na iatu mintu’ bangsa.
Apa belanna nakamaseikomi PUANG sia Napalanda’ tu pangallu’Na Napalaoi sumpa lako nene’ to dolomi, iamoto Nasolangkomi tassu’ tete dio lima mawatang sia Nalendokangkomi dio mai inan minii dipokaunan dio mai kuasanna Firaun datu to Mesir,
ammu issanni, kumua iatu PUANG, Kapenombammi, Kapenomban misari, iamotu Kapenomban maruru’, tu untoe manda’i tu basse sia umpalanda’ kamasokananNa lako mintu’ to ungkamali’I sia ungkaritutui pepasanNa sae lako massa’bu-sa’bu osso’na.
Apa lako simisa’-misa’ tau tu to ungkabiri’I, Napabala’i tu penggauranna, ke Nasanggangi. Tae’ Napadapai lako minda-minda tu ungkabiri’I, sangadinna lako batang kalena Nanii umpabala’i tu penggauranna.
Iamoto la mukaritutui tu pepasan, tu aluk dipondok sia iatu atoran tu kupa’parentan lako kalemu, ammu turu’i.
La dadi tu iannato, ke miperangii te atoran sia mikaritutui tongan, tu Napobannang PUANG, Kapenombammu untoe manda’i tu basse mutanan sola sia umpalanda’i tu kamasoka-nanNa, tu Naallu’ lako nene’ to dolomu, tu Napamatoto’ Napalaoi sumpa.
La Nakamaseiko sia Napamasakkeko sia Napamarapuangko. La Napamasakke tu kakianakanmu sia bura padangmu sia gandungmu sia uai anggoro’ ba’rummu sia minna’mu sia kamabatiranna sapimmu sia kabudanna dombamu sia bembe’mu lan tu tondok, tu mangka Naallu’ Puang lako nene’ to dolomu Napalaoan sumpa, kumua la Nakamaseangko.
La rongko’ko undaoanni mintu’ bangsa; tae’ misa’ muane ba’tu baine la tamanang dio lu kamu sia dio lu patuoammi.
PUANG la umpamambelai tu mintu’ saki dio mai kalemu sia ropu masarrang tu lan Mesir, tu mutandai, moi misa’ tae’ Nala umparuaiko Puang, apa Puang la umparampoi tu mintu’ to ungkabiri’ko.
La mutallanan tu mintu’ bangsa, tu la Nasorongan PUANG, Kapenombammu, lako kalemu; tae’ mula ungkamasei sia tae’ mula umpenombai deatanna, belanna iamoto tu la dadi poya lako kalemu.
Iake lanni penaammu mukua: Iate bangsa marapuan na aku, umba la kukua unnula’i lan mai tondokna,
da mukataku’i tu tau iato; pengkilalai bangi tu apa Napogau’ PUANG, Kapenombammu, lako Firaun sia mintu’ to Mesir,
iamotu kadipandasan kapua, tu mutiro, mintu’ tanda kalle-kallean, mintu’ tanda mangnga, lima mawatang sia takia’ tie’te’; tete dio tu iannato Nanii PUANG, Kapenombammu, ussolangko tassu’. Susimoto la Napogau’ PUANG, Kapenombammu, lako mintu’ bangsa, tu mukataku’.
Ondongpi la Nasua PUANG, Kapenombammu, tu tabuan balo lako tau iato, sae lako minda-minda tu torropa sia iatu to umpembuniangko, la mangsan.
Da muma’parondo ungkataku’i tu tau iato, belanna iatu PUANG, Kapenombammu, den musisolan, iamotu Kapenomban pasareongan sia metakuran.
Masai-sai tu PUANG, Kapenombammu, la unnula’i te mintu’ bangsa dio tingayomu; da mumadomi’ ussang-gangi, kumua da natarru’ buda tu olo’-olo’ masuru dio kalemu.
Susimoto iatu PUANG, Kapenombammu, la ussorongi tu tau iato mai lako kalemu sia la umpamaramba tonganni, sae lako mangsan tu tau iato.
Iatu mai datunna la Nasorong tama kuasammu, muurungan umpa’dei tu sanganna lan mai nasambo langi’. Moi misa’ tau tang naatta unneako sae lako musanggangi nasang.
Iatu rapang-rapang dipodeata dipa’na la miballa; iatu salaka sia bulaan dio rapang-rapang dipodeata iato da mukailui sia da mualai mupoapa, kumua da napoyako, belanna apa iato megallian dio oloNa PUANG, Kapenombammu.
Da mubaai tama banuammu tu apa megallian, kumua da napepayuiko, susitu apa iato. La mukagalli tongan tu iannato sia mukagi’gi’, belanna pepayuan tu apa iato.