Ulangan 8
Mintu’ tu pepasan, tu kupapassanangko te allo iate, la mikaritutui tongan, kumua ammi tuo sia marapuan sia tama tondok sia la miala mipoapa tu mangka Naallu’ PUANG Napalaoi sumpa lako nene’ to dolomi.
Pengkilalai tu mintu’ lalan, tu Nanii PUANG, Kapenombammu, ussolangko lan te patangpulo taunna lan padang pangallaran, kumua anNa pamadiongangko sia Nasandakko, anNa tandai tu apa lan penaammu, ba’tu la mukaritutui tu pepasanNa, ba’tu tae’i.
Tonganna Napamadiongammoko, Napatangdia’moko sia Napakandemoko manna, tu tae’ mutandai sia tae’ natandai nene’ to dolomu, la Nanii umpaissanniko, kumua iatu tau, tae’ nakande manna tu napotuo, sangadinna iatu tau tuo dio mintu’ apa sun dio pudukNa PUANG.
Iatu tamangkale mupake tae’ naburuk sia iatu lette’mu tae’ nakambang lan te patangpulo taunna.
La mangakuko lan penaammu, kumua Naada’ko PUANG, Kapenombammu, susi misa’ ambe’ unnada’ anakna,
sia karitutui tu pepasanNa PUANG, Kapenombammu, ke muturu’i tu lalanNa sia iake mukataku’I.
Belanna iatu PUANG, Kapenombammu, ussolangko tama tondok melo, misa’ tondok, nanii salu’-salu’, nanii kalimbuang sia nanii mata uai tu tikula’dak diong lombok sia dao lu buntu,
sia tondok, nanii gandung sia dalle sisikan, sia garonto’ anggoro’, sia kayu ara sia bua dalima; misa’ tondok nanii kayu saitun, tu buda minna’na sia tani’ enoan;
misa’ tondok, tu munii kala’bian ungkande rotimmu, tu munii tang kapu’duran misa’ apa, tu nanii batu bassi sia lan mai buntunna la munii ungkali tambaga.
La kumandeko, ammu dia’ sia la mupudi tu PUANG, Kapenombammu, belanna diona tu tondok melo, Nakamaseangko.
Kanandai tu kalemu, da mukalupai tu PUANG, Kapenombammu, ke tang mukaritutui tu pepasanNa, atoranNa sia iatu aluk Napondok, tu kupapassanangko allo iate,
kumua, iake kumandeko sadia’mu sia ke umpabendanko banua melo, tu munii torro,
sia iake memba’ka’mi tu sapimmu sia iatu dombamu sia bembe’mu sia iake kerangnganni tu salakamu sia bulaanmu, ondongpi ke kerangnganni tu mintu’ barang apammu,
da mupamadao penaammu sia mukalupai tu PUANG, Kapenombammu, tu ussolangko tassu’ lan mai tondok Mesir, lan mai inan munii dipokaunan.
Iatu Puang ussolangko male ullendu’i padang pangallaran kapua sia metakuran tu nanii ula’ keipo sia te’tek buku, sia iatu padang rangke tang nanii uai; tu umpatassurangko uai lan mai buntu batu laulung,
tu umpakandeko manna lan padang pangallaran, tu tang natandaipa nene’ to dolomu, la umpamadiongko sia la ussandakko, naundinna to la Napogau’ tu kameloan lako kalemu.
Da muma’kada lan penaammu, mukua: Kamawatangangku sia kamatotoranna limangku, anna pabu’tuanna’ tu ianan iate.
Apa la mukilalai tu PUANG, Kapenombammu, belanna Iamo, tu ungkamaseangko kamatotoran la ungkabu’tui tu ianan, kumua anNa palanda’i tu basse, tu Natanan sola nene’ to dolomu Napalaoi sumpa, susitu a’ganna te allo iate.
Apa la dadi, ke mukalupai liumi tu PUANG, Kapenombammu, ammu turu’mo kapenomban senga’ sia umpengkaolai sia tukkuko umpenombai – la kupamanassangkomi totemo, kumua la sanggang tongankomi.
Susitu mintu’ bangsa, tu Namangsanni PUANG belanna kamu, iamoto la mangsan dukakomi, belanna manokakomi umperangii tu gamaranNa PUANG, Kapenombammi.