Yeremia 35

Inde sia tu kada dio mai PUANG lako Yeremia, tonna linona Yoyakim, anakna Yosia, datu Yehuda, Nakua:

Maleko lako bati’na Rekhab, ammu sipa’kada, ammu baai lako banuanNa PUANG, tama misa’ sapa’ sia pairu’i uai anggoro’.

Kualami tu Yaazanya, anakna Yeremia, anakna Habazinya sia mintu’ siulu’na sia mintu’ anakna muane iamotu mintu’ bati’na Rekhab.

Kusolammi tu tau iato mai tama banuanNa PUANG, tama sapa’na bati’na Hanan, anakna Yigdalya, taunNa Puang Matua, tu sisapa’-sapa’na mintu’ arung, daona lu sapa’na Maaseya, anakna Salum, to ma’kampa ba’ba.

Sia kupalenna’ dio tingayona to Rekhab tu ba’tu pira-pira busso nanii uai anggoro’ sola irusan, angku ma’kada lako kukua: Iru’i te uai anggoro’.

Apa nakua tu tau iato mai: Tae’ kima’din unniru’ uai anggoro’, belanna pepasanna ambe’ki Yonadab, anakna Rekhab lako kaleki, nakua: Da miiru’ len uai anggoro’ sae lakona, la kamu la anakmi.

Sia da migaragai banua sia da miambo’ banne sia da mitanan anggoro’ ba’tu umpoapai, sangadinna la torrokomi lan tenda sae lako kamateammi anna dipamalambe’ sunga’mi lan tondok minii butung to sae.

Sia kituru’ nasang tu kadanna ambe’ki Yonadab, anakna Rekhab, lan mintu’na tu napasan lako kaleki, kiurunganni lan mintu’ allo katuoangki tae’ len kiiru’ uai anggoro’, la kami la baineki la anakki muane sia baine.

Sia tae’ kigaragai banua la kinii torro sia tae’ kiampui pa’lak anggoro’ ba’tu pa’lak, ba’tu padang diambo’i.

Sangadinna tontongkanni torro lan tenda, angki turu’i sia kipogau’i tu mintu’ apa napepasanan ambe’ki Yonadab lako kaleki.

Apa iatonna ke’de’ tu Nebukadnezar, datu Babel, ullaoi tondok iate, kikua: Maikomi tamale lako Yerusalem belanna kamatakuran lako surodadu to Kasdim sia to Aram. Iamoto angki torro lan Yerusalem.

Attu iato saemi kadanNa PUANG lako Yeremia, Nakua:

Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Maleko pokadai lako mintu’ to Yehuda sia lako mintu’ to lan Yerusalem: Manokakomiraka untarima peada’ lan unturu’ kadangKu? kadanNa PUANG.

Iatu pepasanna Yonadab, anakna Rekhab, lako anakna, kumua da miiru’ uai anggoro’, nakaritutui, anna tae’ len nairu’ uai anggoro’ sae lako allo iate, belanna unturu’ pepasanna ambe’na. Sia Aku tu ma’kada lako kalemi ke makale’ sia ke karoen, apa tae’ miperangiiNa’.

Sia Kusua lako kalemi tu mintu’ taungKu, iamotu mintu’ nabi ke makale’ sia ke karoen umpokadai, kumua: Pada la mengkatoba’komi dio mai mintu’ lalan kadakemi sia pemeloi tu mintu’ penggaurammi sia damo mituru’ kapenomban senga’ la umpenombai; iake susito la tontongkomi lan tondok, tu Kukamaseangkomi sia nene’ to dolomi. Apa tae’ duka mitananni talinga sia tae’ miperangiiNa’.

Tonganna mintu’ anakna Yonadab, anakna Rekhab, ungkaritutui pepasanna ambe’na, tu napokadanni apa iate bangsa iate tae’ naperangiiNa’.

Iamoto Nakua PUANG, Kapenombanna mintu’ ma’dandan maritik, Kapenombanna to Israel: Tonganna la Kuparampoi mintu’ kamandasan tu Yehuda sia mintu’ pa’tondokan Yerusalem, tu mangka Kupokada la urrampoi, tu belanna ma’kadaNa’ lako kalena, apa tae’ naperangii sia metambaNa’ lako, apa tae’ namebali.

Na lako bati’na Rekhab nakua Yeremia: Inde sia tu kadanNa PUANGna mintu’ ma’dandan maritik, Kapenombanna to Israel: Belanna mituru’ tu pepasanna Yonadab ambe’mi, sia mikaritutui tu mintu’ pepasanna sia mipogau’ tu mintu’ apa napasan lako kalemi,

iamoto nakua kadanNa PUANGna mintu’ ma’dandan maritik, Kapenombanna to Israel: Dio mai Yonadab, anakna Rekhab, tae’ nala ka’tu len tu tau bendan dio oloKu lan mintu’ allo.