Yeremia 36

Iatonna taun ma’penna’pa’ kadatuanna Yoyakim, anakna Yosia, datu Yehuda, saemi tu kada iate dio mai PUANG lako Yeremia, nakua:

Alako karattasa’ sanglulun, ammu sura’i lan tu mintu’ kada, tu mangka Kupokada lako kalemu, tu diona to Israel sia diona to Yehuda sia diona mintu’ bangsa, randuk dio mai allo Kunii ma’kada lako kalemu, iamotu randuk dio mai linona Yosia sae lako allo iate.

Den sia manii upa’ naperangii bangsa Yehuda tu mintu’ kamandasan tu Kusanga la Kuparampoanni, anna pada mengkatoba’ tu tau iato mai dio mai lalan kakadakeanna, angKu pa’dei kakadakeanna sia kasalanna.

Ta’kala natambaimi Yeremia tu Barukh anakna Neria, anna sura’i Barukh tama karattasa’ sanglulun tu mintu’ kada, tu mangka napokada PUANG lako kalena, nasa’bu’ Yeremia.

Nasuami Yeremia tu Barukh, nakua: Den sakkalangangku, kuurunganni tang tama banuanNa PUANG.

Iamoto la maleko, mubasai lan mai lulunan sura’, tu kusa’burangko sia tu mangka musura’, tu mintu’ kadanNa PUANG, anna rangii to buda tu lan banuanNa PUANG ke allo pa’puasan; sia la mubasan tu mintu’ to Yehuda, tu saemo dio mai mintu kotana anna rangi dukai.

Den sia manii upa’ tu palakunna dipenomban dio oloNa PUANG, anna pantan mengkatoba’ tu tau iato mai dio mai lalan kadakena; belanna lendu’ kapuana tu kasengkeanNa sia kare’dekan ara’Na PUANG, tu Napakarranganni te bangsa iate.

Napogau’mi Barukh, anakna Neria, susitu mintu’ napasan nabi Yeremia lako kalena, anna basai tu kadanNa PUANG lan mai sura’ iato, lan banuanNa PUANG.

Iatonna taun ma’pellima kadatuanna Yoyakim, anakna Yosia, datu Yehuda tonna bulan ma’pengkasera, napa’peissanammi mintu’ to buda dio Yerusalem sia mintu’ to buda sae dio mai mintu’ kota Yehuda lako Yerusalem, kumua la ma’puasa dio oloNa PUANG.

Nabasami Barukh lan mai sura’ iato tu mintu’ kadanNa Yeremia, anna rangii mintu’ to buda, lan banuanNa PUANG, iamotu lan bilikna Gemarya, anakna Safan, pangulu to massura’, dio tarampak daona lu iring, dio lu babangan ba’ru banuanNa PUANG.

Iatonna rangimi Mikhaya, anakna Gemarya, anakna Safan, tu mintu’ kadanNa PUANG lan mai sura’ iato,

malemi rokko tongkonan layukna datu, natama bilikna pangulu to massura’, sia mintu’ arung marassan unno’ko’ dio, iamotu mai pangulu to massura’ Elisama, Delaya, anakna Semaya, Elnatan, anakna Akhbor, Gemarya, anakna Safan, Zedekia anakna Hananya sia mintu’ arung.

Napokadami Mikhaya lako tau iato mai tu mintu’ kada, tu mangka narangi, tonna basai Barukh, lan mai sura’ narangii to buda.

Nasuami tu mai arung Yehudi, anakna Netanya, anakna Selemya, anakna Kusyi umpellambi’i Barukh, nakua: Iatu lulunan sura’ tu mubasan to buda la muala mumale mai. Naalami Barukh, anakna Neria tu lulunan sura’ iato, namale umpellambi’i tau iato mai.

Nakuami tau iato mai lako: Unno’ko’ko ammu basangkanni. Nabasammi Barukh.

Iatonna rangimi tau iato mai tu mintu’ kada iato, pada umpokadami kamatakuranna, nakua: Inang la kiparampoan duka datu te mintu’ kada iate.

Mekutanami tu tau iato mai lako Barukh, nakua: Pokadangkanni, umba mukua ussura’i te mintu’ kada iate?

Mebalimi Barukh lako tau iato mai, nakua: Pudukna bangsiamo umpokadanna’ te mintu’ kada iate, kusura’i tinta tama te sura’.

Nakuami tu mintu’ arung iato lako Barukh: Malemokomi membuni, la iko la Yeremia; moi misa’ tau da naissanni tu mininna.

Attu iato malemi tu tau iato mai umpennoloi datu tama tarampak, apa iatu lulunna sura’ napatorro dolo lan bilikna Elisama, pangulu to massura’, anna parampoi tu mintu’ kada iate lako datu.

Nasuami datu tu Yehudi male unnalai tu lulunan sura’, anna alai lan mai bilikna Elisama, pangulu to massura’. Nabasammi Yehudi tu datu sia mintu’ arung, tu bendan dio sa’dena patomali.

Attu iato unno’ko’ tu datu lan tongkonan layuk tu nanii, ke attu madingin, tonna bulan ma’pengkasera, na iatu dapo’ pendarangan dio olona datu nanii api dukku.

Iatonna mangkamo Yehudi umbasanni tallu a’pa’ muka, nase’pa’i datu piso to massura’, na iato passerekanna nabuang tama api dapo’ pa’lassuan, naurungan tappu’ tu mintu’ lulunan sura’ iato nakande api, tu dio dapo’ pendarangan.

Tae’ duka natiramban tu penaanna tau iato mai sia tae’ duka naserek-serekki tu pakeanna la datu la mintu’ to mase’ponna, tonna rangii tu mintu’ kada iato.

Moi umba nakua tu Elnatan sia Delaya sia Gemarya mengkamoya umpalakui lako datu kumua da nadiballa tu lulunan sura’ iato, apa tae’ naperangii tu tau iato mai.

Mangkato nasuami datu tu Yerahmeel, anak arung, sia Seraya, anakna Azriel, sia Selemya, anakna Abdeel, untingkan Barukh, to massura’ sia nabi Yeremia, apa Nabunimo PUANG sola duai.

Attu iato saemi kadanNa PUANG lako Yeremia, tonna mangkamo datu umballai tu lulunan sura’, tu nasura’ Barukh, nasa’bu’ Yeremia, Nakua:

Ala pole’ko misa’ lulunan sura’ senga’ sura’i tama tu mintu’ kada dolo, tu lan lulunan sura’ dolo, tu naballa Yoyakim, datu Yehuda.

Sia pokadai tu diona Yoyakim, datu Yehuda, kumua: Nakua kadanNa PUANG: Mangkamo muballa tu lulunan sura’ iate sia mukua: Ma’apai misura’i lan, kumua manassa la sae tu datu Babel la ussanggangi te tondok iate sia ussabu’i mintu’ tolino sia patuoan?

Iamoto nakua kadanNa PUANG tu diona Yoyakim, datu Yehuda: Moi misa’ tau dio mai kalena tae’mo tu la unnisung dao kapayunganna Daud sia iatu batang rabukna la dipembuangan anna alloi ke masiangi sia anna tarru’i dingin ke mabonginnai.

La Kupapakkanni lako kalena sia lako ampo bati’na sia lako mintu’ to mase’ponna tu mintu’na kakadakeanna sia la Kuparampoi mintu’ kamandasan tu tau iato mai sia mintu’ to lan Yerusalem sia mintu’ to Yehuda, tu mangka Kupokada la urrampoi, apa manoka umperangii.

Ta’kala naalami Yeremia tu misa’ lulunan sura’ senga’, anna benni Barukh anakna Neria, to massura’, anna sura’i tama tu mintu’ kada nasa’bu’ Yeremia lan mai sura’ iato, tu naballa Yoyakim, datu Yehuda, sia narangannipa ba’tu pira-pira kada, tu pada issinna.