O PUANG tu Kapenombangku: Kamumo tu la kupakala’bi’, la kupudi-pudi tu sangamMi, belanna umpogau’moKomi apa kalle-kallean, mintu’ tu apa Mipondok tempon dio mai. Mipalolang malambu’mo sia maruru’.
2
Belanna iatu kota iato Mipatisambo’ tu batunna, sia iatu tambakuku iato Mipasangtinti to batu disaeran, sia iatu bentengna to salian lembang tang Mipopengkotamo, tae’mo anna dibangun sule tontong sae lakona.
3
Iamoto anna pakala’bi’Komi bangsa mawatang, sia la nakataku’Komi bentengna tu mai bangsa lalong.
4
Belanna Kamumo tu pentilindungan matoto’na to bitti’, sia pentilindungan ma’toto’na to bongko lan kapu’duranna, sia pentirerungan, ke uran bara’i, sia pentionganan, ke sarrangi tu allo. Belanna iatu urrungna to masa’ga’ susimoto uran bara’ untu’ba’ benteng tembo’ susi lassu’ dio to’ padang marangke.
5
Iatu angnga’na to salian tondok Mipamoro’ lu rokko: susi lassu narerung bayo-bayo saliu’, ten dukato tu sengona to masa’ga’ Miparapa’.
Karongkosan dao Sion la rampo lako mintu’ bangsa6
Anna dao buntu Nanii PUANGna mintu’ ma’dandan maritik umpadenanni pa’maruasan kande sanda mammi’na tu mintu’ bangsa, pa’maruasan uai anggoro’ mammi’: utak buku, kande mammi’, uai anggoro’ mammi, tu mangka dipanapi’.
7
Dao buntu ia duka te la Nanii ullendokanni, tu bungku’ lindo tu urrerung lindona mintu’ sangpetayanan, sia Nanii ulleakan lullung, tu ussamboi mintu’ bangsa.
8
La Napaputta tontong sae lakona tu kamatean, sia la Napa’dii Puangta PUANG tu mai uai mata, sia iatu kamatunanna taunNa la Napa’dei lan mai mintu’ nasambo langi’, belanna susimoto tu kadanNa PUANG.
9
Allo iato la ma’kada tu tau kumua: Inang Iamo Kapenombanta te, tu tanii sande’, kumua Iamo la urram-panangki’; Iamo PUANG te, tu taposande’; maikomi anta unnarrak sia parannu diona kadirampanan lu dio mai Puang.
10
Belanna iatu limanNa PUANG la mendemme’ indete buntu, apa iatu Moab la dilullu’ rokko to’ inanna, butung to dalame dilullu’ rokko to’ uai patuang pangangku’.
11
Umpopengkulea’mi limanna lan, susito mengkulea’ la unnorong, anNa pasosso’ lu rokkoi Puang tu kamatampoanna, moi anna pengkullei tonganni la mella’ka’.
12
Iatu mintu’ menara dao lu bentengmu, Nasongkan sia Natepok, sia Napasirante padang.