Yesaya 26

Allo iato iatu nanian iate la napopenani tau lan tana Yehuda nakua: Den kami tu kota matoto’ki; kamakarimmanan Nabentenganni sia Natambakukuanni Puang.

Bungka’i tu ba’ba babangan, anna tama tu bangsa masallo’, tu untoe manda’ kamarurusan.

Iatu to matu’tun penaanna Mikaduttu’ kamarampasan sundun, belanna sande’ mati’ Kalemi.

Tontongkomi sande’ lako PUANG belanna Puangta PUANG iamo misa’ buntu batu sipuli padang.

Belanna Napembuangan tu to unnisung dao madaona, iamotu to toppo’ dao benteng malangka’. Napopengkadiongan, Napopengkadiongan sae rokko padang, Napasirante padang.

Naurunganni nalese-lese lentek, iamotu lentekna to mase-mase sia nasalembe’ len to bitti’.

Iatu lalanna to malambu’ lappa’ bang; Kamumo tu umpamalappa’i tu lalanna to malambu’.

Susi dukato dio lalan ukungamMi kipeagi bangkomi, o PUANG; mamali’ bang tu penaangki lako sangamMi sia lako kadikilalaiamMi.

Kalebu tallang tu penaangku lan ungkamali’Komi ke bongi, ondongpi iatu ba’tengku lan undaka’ bangKomi; belanna iake rampomi tama lino tu mai ukungamMi, attu iato mintu’ issinna lino umpelada’i kamaloloan.

Moi anna dikatirinnai tu to tang mekaaluk, inang tae’ anna pelada’i tu kamaloloan, sangadinna umpogau’ kakelokan illan tondok nanii kamalamburan sia tae’ duka anna tiroi tu kamala’biranNa PUANG.

O PUANG, tie’te’ tu limamMi, apa tae’ anna mengkilala; apa la mengkilala sia masiri’ diona kamakaritutuamMi lako bangsa iato. Ondongpi iatu api ungkande to umbaliKomi, la ungkande duka tau iato mai.

O PUANG, Kamumo la umpabu’tuangkan kamarampasan belanna iatu mintu’ penggaurangki Kamu umpogaurangkan.

O PUANG, Kapenombangki, naparentamokan tu mai puang senga’; apa sangamMi manna tu la kipangke’.

Iatu to mate tae’mo anna tuo sule, iatu bombo to mate tae’mo anna malimbangun, iamoto Miukung, Misanggangi sia iatu mintu’ tanda kadikilalaianna tu tau iato mai Mipa’dei.

Mipopemba’ka’mo, o PUANG, tu bangsa iate, Mipopemba’ka’mo, sia Mipamala’bi’mo tu Kalemi, mintu’ lili’ padangna Mipakalua’mo.

O PUANG, iatonna mandasa tu tau iato mai, nadaka’moKomi, iatomMi ada’i, umpakendek kamama’mi passambayangna.

Ten to baine ma’tambuk, iake nalambi’mi attunna, mangumbero sia sumarro mangurria’, ten dukamokan to, o PUANG, dio oloMi.

Ma’tambuk dukakan, mangumbero dukakan, apa sangtintikan to ungkianakan angin; tae’ angki umpabu’tuan katilendokanna tana sia tae’ angki padadian la napoissinna lino.

Mintu’ taumMi tu matenamo la tuo sule, sia batang rabukku duka; mintu’i la pada malimbangun. Millikkomi sia kumalasi-lasikomi, e kamu sola nasang, tu to diong litak! belanna iatu damo’Mi iamo damo’ paarrang; sia iatu litak la ullua mintu’ to mangka mate.

Maikomi, e taungku, tamakomi sumbung iringmi, ammi salli’i tu ba’bami: membunikomi sattu’, sae lako merena tu kasengkean.

Belanna la sun tu PUANG lan mai inanNa la umpapakkanni kakadakeanna mintu’ issinna lino lako tau iato mai; la napasombo lino tu rara tibollona tau iato mai sia nokamo ussamboi tu mai batang rabukna tu mai to mate dipongko.