Yosua 15

Iatu taana suku to Yehuda tonna diloterei unturu’ mintu’ pa’rapuanna ma’angge lili’na Edom, sae lako padang pangallaran Zin ma’palusau’na, dio iringna rampe lo’na lu.

Iatu katonanna lo’na lu randuk dio mai iringna tasik Ma’sin, randuk dio mai tasik mengkoko, tu ma’palusau’na;

rampo lako lo’na lu lombokna dao tanete, tu umposanga Te’tek Buku, natarru’ lako Zin, namale langngan lo’na lu Kadesh-Barnea, nalendu’i tu Hezron, namale langngan Adar, na mengkoko sule langngan Karka,

sia tarru’ lako Azmon, anna tassu’ sae lako salu’-salu’ Mesir, naurungan iatu anggenna sumpu lako tasik. Iamote tu angge lili’ padangmu rampe sau’na.

Iatu angge padangna dio rampe matallo iamotu tasik Ma’sin sae lako minanga Yordan. Iatu angge padangna daanna lu randuk dio mai tasik mengkoko dio minanga Yordan;

iatu angge padangna ma’palulangngan Bet-Hogla, tarru’ rekkena Bet-Araba, anna tarru’ langngan tu anggena dao buntu batu Bohan, anakna muane Ruben.

Inde to dio mai iatu anggenna ma’palulangngan Debir, tassu’ diong mai lombok Akhor, namane tibalik dio mai lu lako Gilgal, tu sitingoan lombok dao tanetena Adumim, lo’na lu salu’-salu’. Na iatu anggenna tarru’ lako to’ uainna En-Semes na iatu tampakna dio En-Rogel.

Inde to dio mai iatu anggenna ma’palulangngan lombok Ben-Hinom, sipeupu’ mennaa’na buntu Yebus lo’na lu, iamo tu Yerusalem; namane iatu anggenna tarru’ langngan botto buntu, tu sitingoan lombok Hinom, rampe matampu’, tu dio biring daanna lu lombok to Refaim.

Namane tilekko tu anggenna dao mai botto buntu iato lako to’ kalimbuang dio Me-Neftoah, namane rampo lako mintu’ kota dao lu buntu Efron; namane iatu anggenna tilekko lako Baala, iamo tu Kiryat-Yearim.

Namane tilekko tu anggenna dio mai Baala rampe matampu’ lako buntu Seir, namane ma’palurekke lako buntu ma’borongna Yearim, iamo tu Kesalon; namane ma’palurokko Bet-Semes, natarru’ lako Timna.

Iatu anggenna tassu’ ma’palurekke sae lako buntu mennaa’na Ekron; namane tilekko lako Sikron, tarru’ lako buntunna Baala, sia tarru’ sae lako Yabneel; na iatu tampak katonanna sae lako tasik rampe matampu’.

Iatu anggenna dio rampe matampu’ iamotu tasik Kapua sia biringna. Iamoto tu mintu’ angge padangna to Yehuda tiku lao unturu’ pa’rapuanna.

Na iatu Kaleb, anakna Yefune, napaketaa Yosua misa’ mana’ dio lu to Yehuda, iamo tu Kiryat-Arba, susitu kadanNa PUANG lako Yosua; iatu Arba iamo ambe’na Enak. Iamote tu Hebron.

Inde to dio mai nanii Kaleb urrambai tu to Enak sola tallui, iamotu Sesai, Ahiman na Talmai, anakna muane Enak.

Inde to dio mai nanii ke’de’ la ullaoi to umpa’tondokki Debir. Iatu Debir dolona disanga Kiryat-Sefer.

Ma’kadami tu Kaleb nakua: Minda-minda untaloi tu Kiryat-Sefer anna alai, la kuben tu Akhsa, anakku baine, anna pobainei.

Natalomi Otniel, anakna Kenas, siulu’na Kaleb, tu kota iato, anna benni tu Akhsa, anakna, napobaine.

Iatonna rampomo tu baine lako, nanaranni tu muanena la lao umpalaku pa’pa’lakan lako ambe’na. Anna mengkalao dao mai keledainna. Nakutanaimi Kaleb nakua: Apara mutungkanan?

Mebalimi nakua: La mitekkennina’ angki pokasibalianni; mangkamo’ miben padang rangke, la miben dukamo’ ba’tu pira-pira kalimbuang. Nabenmi tu kalimbuang daona lu sia iatu kalimbuang diongna lu.

Inde sia tu taa mana’na suku to Yehuda unturu’ mintu’ pa’rapuanna.

Iatu mai kota mambelanna liu suku to Yehuda, sikandappi’ anggenna Edom dio Padang Lo’na lu iamotu: Kabzeel, Eder, Yagur,

Kina, Dimona, Adada,

Kedesy, Hazor, Yitnan,

Zif, Telem, Bealot,

Hazor-Hadata, Keriot-Hezron, iamo tu Hazor,

Amam, Sema, Molada,

Hazar-Gada, Hesmon, Bet-Pelet,

Hazar-Sual, Bersyeba sia mintu’ lili’na,

Baala, Iyim, Ezem,

Eltolad, Kesil, Horma,

Ziklag, Madmana, Sansana,

Lebaot, Silhim, Ain na Rimon, mintu’ tu kota iato duangpulo ngkasera sola kampongna.

Diong Padang Merrantena: iamotu mai kota Estaol, Zora, Asna,

Zanoah, En-Ganim, Tapuah, Enam,

Yarmut, Adulam, Sokho, Azeka,

Saaraim, Aditaim, Gedera na Gederotaim; mintu’ tu kota iato sangpulo a’pa’ sola kampongna;

Zenan, Hadasa, Migdal-Gad,

Dilean, Mizpa, Yokteel,

Lakhis, Bozkat, Eglon,

Kabon, Lahmas, Kitlis,

Gederot, Bet-Dagon, Naama sia Makeda; mintu’ tu kota iato sangpulo annan sola kampongna;

Libna, Eter, Asan,

Yiftah, Asna, Nezib.

Kehila, Akhzib sia Maresa; mintu’ tu kota iato kasera sola kampongna.

Sia Ekron sola lili’na sia kampongna.

Randuk dio mai Ekron ma’palulako tasik mintu’ kota tu sisa’de Asdod sia kampongna;

Asdod sola lili’na sia kampongna, Gaza sola lili’na sia kampongna, sae lako salu’-salu’na Mesir, tasik Kapua sia biringna.

Na dao Ma’buntunna iamo tu Samir, Yatir, Sokho;

Dana, Kiryat-Sana, iamo tu Debir;

Anab, Estemo, Anim,

Gosyen, Holon sia Gilo; mintu’ tu kota iato sangpulo misa sola kampongna;

Arab, Duma, Esan,

Yanum, Bet-Tapuah, Afeka,

Humta, Kiryat-Arba, iamo tu Hebron, sia Zior; mintu’ tu kota iato kasera sola kampongna;

Maon, Karmel, Zif, Yuta,

Yizreel, Yokdeam, Zanoah,

Kain, Gibea sia Timna; mintu’ tu kota iato sangpulo sola kampongna;

Halhul, Bet-Zur, Gedor,

Maarat, Bet-Anot sia Eltekon; mintu’ tu kota iato annan sola kampongna;

Kiryat-Baal iamo tu Kiryat-Yearim sia Raba; da’dua tu kota iato sola kampongna.

Sia lan padang pangallaran, iamo tu Bet-Araba, Midin, Sekhakha,

Nibsan, Ir-Hamelakh sia En-Gedi; mintu’ tu kota iato annan sola kampongna.

Apa tae’ nakulle to Yehuda unnula’i tu to Yebus, tu umpa’tondokki Yerusalem; iamoto natorro ma’tondok tu to Yebus sola to Yehuda dio Yerusalem sae lako allo iate.