Mangkato napamanassami loterei tu taa mana’na bati’na Yusuf: randuk dio mai Yordan sikandappi’ Yerikho, rampe matallona to’ uainna Yerikho, nalendu’i tu padang pangallaran, tu randuk dio mai Yerikho ma’palulangngan dao lu buntu rampo langngan Betel,
2
sia tarru’ dio mai Betel lako Lus; na mane tarru’ lako lili’na to Arkhi, lako Atarot,
3
anna ma’palurokko matampu’ lako lili’na to Yaflet sae lako lili’na Bet-Horon diongna lu sia tarru’ lako Gezer, na iatu tampak katonanna sae lako to’ tasik.
4
Den duka tu taa mana’na Manasye sola Efraim, anakna Yusuf.
5
Inde sia tu lili’na to Efraim unturu’ pa’rapuanna, iamotu: dio rampe matallo tu anggenna taa mana’na Atarot-Adar sae lako Bet-Horon daona lu.
6
Iatu anggenna ma’palulako rampe matampu’ daanna lu Mikhmetat, namane tilekko ma’palutama rampe matallo lako Taanat-Silo, natarru’ inde to dio mai lako rampe matallona Yanoah;
7
dio mai Yanoah ma’palurokko Atarot sia Naharat, untu’tun lili’na Yerikho, na iatu tampakna sae lako Yordan.
8
Iatu anggenna dio mai Tapuah ma’palulako rampe matampu’ lako salu’-salu’ Kana, na iatu tampakna sae lako to’ tasik. Iamoto tu taa mana’na rapu to Efraim unturu’ pa’rapuanna.
9
Sia ia duka tu kota dipasengaran to Efraim lan lu taa mana’na Manasye, iamotu mai kota sola kampongna.
10
Apa iatu to Kanaan tu umpa’tondokki Gezer tae’ naula’i, naurungan ma’tondok tu to Kanaan dio lu to Efraim sae lako allo iate, apa napotoma’diama.