Yosua 17

Inde sia tu taa mana’na suku Manasye tonna diloterei, belanna iamo anak pa’bunga’na Yusuf, iamo tu Makhir, anak pa’bunga’na Manasye, ambe’na Gilead, dipaketaamo Gilead sola Basan, belanna ia misa’ to lalong.

Den duka napotaa tu mai anakna muane Manasye tu senga’na unturu’ pa’rapuanna, iamotu anakna Abiezer, Helek, Asriel, Sekhem, Hefer sia Semida; iamote tu anak muane nadadian Manasye, anakna muane Yusuf, unturu’ pa’rapuanna.

Apa iatu Zelafehad, anakna muane Hefer, anakna muane Gilead, anakna muane Makhir, anakna muane Manasye, tae’ muane nadadian, sangadinna baine manna. Inde sia tu sanganna tu mai anakna baine, iamotu Mahla, Noa, Hogla, Milka sia Tirza.

Saemi tu tau iato mai mennolo lako Eleazar to minaa sia Yosua, anakna Nun, sia mintu’ pangulu anna ma’kada, nakua: Napasanmo PUANG lako Musa la umbenkan mana’ dio lu mintu’ anak muaneki. Iamoto nabenni mana’ tu tau iato mai dio lu mintu’ siulu’na ambe’na, unturu’ pepasanNa PUANG.

Susimoto tu taana Manasye dipa’sangpulo, sangadinna Gilead sola Basan, tu sambalinna lu Yordan,

belanna iatu anakna baine Manasye dipaketaamo dio to’ anakna muane, na iatu padang Gilead napotaamo anakna muane Manasye, tu senga’na.

Iatu angge padangna Manasye randuk dio mai Asyer sae lako Mikhmetat, tu dio rampe matallona Sikhem, anna ma’palusau’ lako inanna to umpa’tondokki En-Tapuah.

Iatu padang nalili’ Tapuah napotaamo Manasye, apa iatu kota Tapuah, tu sikandappi’ anggenna Manasye, napotaa Efraim.

Iatu angge iato ma’palurokko salu’-salu’ Kana, lo’na lu salu’-salu’ iato. Iatu mai kota inde to napotaa Efraim, moi anna paritangngai kotana Manasye. Iatu anggenna padangna Manasye daanna lu salu’-salu’ na iatu tampakna sae lako tasik.

Iatu padang lo’na lu napotaa Efraim sia iatu padang daanna lu napotaa Manasye. Iatu anggenna iamotu tasik; na iatu daanna lu tu’tun lako Asyer, na iatu matallona tu’tun lako Isakhar.

Iatu kota lan Isakhar sia lan Asyer tu napotaa Manasye, iamotu Bet-Sean sola lili’na, Yibleam sola lili’na, to torro dio Dor sola lili’na, to torro dio En-Dor sola lili’na, to torro dio Taanakh sola lili’na sia to torro dio Megido sola lili’na, iamotu tallu tondok ma’tanete.

Apa iatu to Manasye tae’ nabela untaloi tu mai kota iato, belanna matoto’mo tu to Kanaan torro umpa’tondokki.

Iatonna mandumo matoto’ tu to Israel napotoma’diama duka tu to Kanaan, apa tae’ naula’i nasangi.

Ma’kadami tu bati’na Yusuf lako Yosua, nakua: Ma’apari, ke sanglotereianni anna sangtaanri mibenkan kipotaa mana’, anna kami te misa’kan to marapuan, belanna PUANG umpamaupa’kan sae lako allo totemo.

Ma’kadami Yosua lako tau iato mai nakua: Iake misa’komi to marapuan, malemokomi langngan pangala’, ammi lellengi sia seroi minii ma’tondok tu padang to Feris sia to Refaim, ke si’pi’mokomi dao lu buntu Efraim.

Ma’kadami tu bati’na Yusuf nakua: Si’pi’mokanni dao lu padang ma’buntunna namintu’ to Kanaan tu diong lu marantena, unnampui kareta bassi, la iatu mai to torro lan Bet-Sean sia lili’na la iatu mai to torro lan padang marantena Yizreel.

Ma’kadami tu Yosua lako bati’na Yusuf, iamotu lako Efraim sola Manasye, nakua: Iatu kamu misa’komi bangsa marapuan sia mawatang; tae’ mila unnappa’ bangri sangtaan, ke diloterei,

sangadinna la mipotaa duka tu padang ma’buntunna; sia belanna padang pangallaran, iamoto mila ullellengi sia usseroi. Ia dukamoto mila umpotaai sae lako tampakna, belanna la miula’i tu to Kanaan lan mai, moi naampui tu kareta bassi sia mandu mawatang tu tau iato mai.