Yesaya 19
Ieu pangandika perkara Mesir. PANGERAN keur majeng gancang ka Mesir nitihan mega. Brahala-brahala Mesir mani ngarompod di payuneuna-Na, urang Mesir galimir.
PANGERAN ngandika, "Urang Mesir ku Kami rek disina perang pada batur, dulur perang jeung dulur, tatangga perang jeung tatangga, kota perang jeung kota, raja tarung jeung raja, parebut kakawasaan.
Sagala tarekah Mesir sina teu matak nyugemakeun dirina, sumangetna sina melempem. Bakal marenta tulung ka brahala-brahalana, naranya ka tukang torah, marenta pituduh ka arwah-arwah jelema nu geus paraeh.
Urang Mesir rek diserenkeun ka hiji jelema bengis, sina dikawasaan ku raja lalim. Kitu timbalan Kami, PANGERAN Nu Maha Kawasa."
Walungan Nil bakal orot caina, lila-lila garing pisan.
Terusan-terusanana sajeroning ngorotan jadi bau. Kaso jeung wawalinianana bakal aralum,
palawija turut-turut sisi eta walungan bakal gararing, tuluy euweuh, kakebut ku angin.
Jalma-jalma anu tatali huripna tina ngala lauk di Walungan Nil bakal rumahuh, useupna taya nu nyanggut, jaringna teu beubeunangan.
Tukang-tukang nyieun baju linen paregat harepan.
Tukang-tukang ninun jeung patukangan-patukangan lianna kari nguluwut pikiranana.
Para pamingpin kota Soan kabeh barodo! Juru-juru nasehat anu pangbijaksanana di Mesir, nasehat-nasehatna barurung kabeh! Kacida waranina ka raja ngarakukeun maneh turunan raja-raja baheula, turunan anu laluhung!
Eh raja Mesir! Mana juru nasehat maneh nu palinter teh? Cik, sugan barisaeun nerangkeun ka maneh perkara pangersa PANGERAN Nu Maha Kawasa ka Mesir.
Para pamingpin Soan jeung Mempis kabeh barurung. Kalah ka ongkoh rek mingpin rahayat, tapi malah nyasabkeun.
Sagala pirempugna ku PANGERAN disina teu uni. Tungtungna sagala peta urang Mesir jadi serba salah jeung kawas jelema mabok anu ngajolongjong tisoledat ku utahna sorangan.
Nu beunghar, nu miskin, jalma penting, jalma biasa, di Mesir geus teu aya saurang-urang acan anu sanggup mere pitulung.
Bakal datang mangsa urang Mesir jadi borangan kawas awewe. Bakal ngarompod barang narenjo PANGERAN ngulang panangan rek ngahukum ka maranehna.
Unggal aringeteun deui kana balahi-balahi ti PANGERAN Nu Maha Kawasa anu baheula tumiba, urang Mesir kacida singsieuneunana ku Yuda teh.
Lamun geus datang waktuna, lima kota di Mesir bakal ngaromong ku basa Ibrani. Urang dinya lana ngucapkeun ikrar bakal nyarebut jenengan PANGERAN Nu Maha Kawasa. Salah sahiji kotana bakal disebut "Kota Surya".
Lamun waktuna geus cunduk, di tanah Mesir bakal aya hiji altar haturan PANGERAN, jeung di wates tanahna bakal diayakeun hiji tugu anu dibaktikeun ka Mantenna.
Eta pikeun tanda yen PANGERAN Nu Maha Kawasa aya di Mesir. Mun urang dinya digencet sarta sasambat menta tulung ka PANGERAN, Mantenna bakal ngutus nu baris ngajait maranehna.
PANGERAN bakal ngebrehkeun anjeun ka urang Mesir sarta maranehna bakal percaya jeung ngabarakti ka Mantenna, nyaranggakeun kurban jeung pangbakti, sarta tarurun kaul, tur kaulna dicarumponan.
Mesir bakal dihukum ku PANGERAN, tapi ku Mantenna bakal ditambaan sina cageur deui. Maranehna bakal tarobat, panyambatna bakal didangu ku Mantenna, kanyerina bakal dicageurkeun.
Dina mangsa eta antara Mesir jeung Asur bakal aya jalan gede. Jalma-jalma ti eta dua nagri bakal parulang-anting, daratang, sarta eta dua bangsa bakal babarengan ngalampahkeun ibadah.
Dina mangsa eta urang Israil bakal satata jeung Mesir jeung Asur, sarta ieu tilu bangsa bakal mawa berkah ka saalam dunya.
PANGERAN Nu Maha Kawasa bakal ngaberkahan ka maranehna, sarta kieu timbalana-Na, "Maneh Mesir umat Kami, ku Kami diberkahan, kitu deui Asur beunang Kami ngayugakeun, sarta maneh eh Israil, maneh teh umat pilihan Kami."