“Yunuse, kena meije akeu lopai kota Niniwe, kota elake mere leke abeteke saisa rebe Au betekele ete alere etesi.”
3
Eleki Yunuse iakneka kena ikeu lopai kota Niniwe lulu Alla Ibeteke eteije. Niniwere kota elake titinaije neka, esi elake keue petua telu.
4
Yunuse ikusu kota mere, ikeue petu esa eleki ikloloe be, “Tamata Niniwe imi, petua butu ata suike kota Niniwe meije, Alla Iatiae kai imi tamataru!”
5
Kena tamata Niniwe esi lene Yunuse ibeteke mere hoko esi hlaleke loko Alla, eleki esi beteke loko pusue tamata leke esi kane mo kai pusue elake inai kai kwetele esi alike pakiane tiae rebe aseluke be kaplalesi titinai.
6
Kena kota Niniwe esi kamale ilene Yunuse ibeteke mere hoko irulu bei eni otoi maka pletare, ilesu eni lapu nanuke eleki ialike pakiane tiae eleki irue kena lopone.
7
Eleki kamale kai eni tamata elakaru esi ulake beteke tita ete pusue tamata me kota mere be, “Tamata, binatane lupe sape, domba kai pipi kane sasaisa yake, kane tapoane yake kai kinu sasaisa yake.
8
Suke pusue tamata kai binatane alike pakiane tiae kai kotie ktili loko Alla kai pusue hleke bei ono neune kai ono dosare.
9
Sepo ite ono ele mere, tinake Alla laleIje noa ite eleki Inasuke ite moneka kai ibunu ite moneka.”
10
Alla Iselu esi hleke bei ono neune, hoko laleIje noasi eleki Ihukumesi mone.