Jabur 31
Kanggo lurah pasindhen. Masmur anggitane Prabu Dawud.
(31-2) Dhuh Yehuwah, kawula ngayom dhumateng Paduka,kawula mugi sampun ngantos nandhang kawirangan.
Mugi Paduka ngentas kawula amargi kaadilan Paduka,(31-3) Paduka mugi nilingna dhateng kawula,
karsaa enggal paring wangsulan!Paduka mugi karsaa dados redi sela papan pangayoman kawula,
beteng santosa ingkang mitulungi kawula!(31-4) Awit Paduka punika redi sela tuwin beteng kawula,
kawula badhe Paduka irid saha Paduka tuntun margi saking asma Paduka.
(31-5) Paduka badhe ngluwari kawula saking kala,
ingkang kapasang dening tiyang kangge kawula,
amargi Paduka ingkang dados pangauban kawula.(31-6) Nyawa kawula, kawula pasrahaken wonten ing asta Paduka;
dhuh Yehuwah, Allah ingkang setya tuhu, Paduka ingkang ngluwari kawula.
(31-7) Paduka sengit dhateng tiyang ingkang memuja dhateng brahala ingkang tanpa gina,
nanging kawula pitados dhumateng Sang Yehuwah.
(31-8) Kawula badhe asurak-surak sukarena margi sih-kadarman Paduka,
awit Paduka mirsani kasrakatan kawula saha nupiksani karupekaning nyawa kawula,
(31-9) saha kawula boten Paduka ulungaken dhateng ing tanganing mengsah,
nanging Paduka kekahaken lampahing suku kawula wonten ing omberan.
(31-10) Dhuh Yehuwah, mugi kawula Paduka welasi, awit kawula rumaos rupek;
mripat, nyawa tuwin badan kawula nglemprek saking prihatos.
(31-11) Amargi gesang kawula katedha ing kasisahan
saha tauning umur kawula sami telas dening pangesah;kekiyatan kawula mundur margi saking kasangsaran kawula,
sarta balung kawula sami gopok.(31-12) Kawula dados cecampahaning mengsah kawula,
lan njalari girisipun para tangga tepalih kawula,punapa dene damel kagetipun para pitepangan kawula;
tiyang ingkang sami sumerep kawula wonten ing margi, lajeng sami lumajeng.(31-13) Kawula sampun ical saking pengetan kadosdene tiyang pejah,
kawontenan kawula kados barang ingkang sampun pecah.
(31-14) Amargi kawula mireng tiyang kathah sami bisik-bisik,
-- kawula kinepang ing pagiris --sami sekuthon badhe nglawan dhateng kawula,
ngangkah dhateng nyawa kawula.(31-15) Nanging kawula kumandel dhumateng Paduka, dhuh Yehuwah,
kawula matur: “Paduka punika Allah kawula!”
(31-16) Gesang kawula punika wonten ing asta Paduka,
Paduka mugi karsaa nguwalaken kawulasaking tanganipun para satru kawula saha tiyang ingkang sami ngoyak-oyak kawula!
(31-17) Wadana Paduka mugi madhangna abdi Paduka,
kaluwarana margi saking sih-kadarman Paduka!
(31-18) Dhuh Yehuwah, kawula mugi sampun ngantos Paduka tegakaken
ing salebetipun nandhang kawirangan,amargi kawula nyebut dhumateng Paduka;
tiyang duraka punika kajengipun sami nandhang kawirangan
mandhapa dhateng teleng palimengan klayan kendel.(31-19) Sakathahing lambe cidra kajengipun dados bisu,
ingkang nyendhu dhateng tiyang burus
kalayan kumethak lan nyenyampahi!(31-20) Iba lubering kautamen Paduka
ingkang kacawisaken dhateng tiyang ingkang ngabekti dhumateng Paduka,ingkang sampun Paduka tandukaken dhateng tiyang ingkang sami ngayom dhateng ing Paduka,
wonten ing ngajengipun manungsa!(31-21) Punika sami Paduka singidaken wonten ing pangayomaning wadana Paduka,
margi saking wontenipun sekuthoning tiyang;sami Paduka ayomi wonten ing pamondhokan
supados lepat saking padudonipun ilat kathah.(31-22) Pinujia Sang Yehuwah, awitdene sih-kadarmane
dikatingalake marang aku kanthi patrap kang nggumunake
nalika aku ketaman ing karupekan!(31-23) Amargi saking bingung kawula, kawula nginten:
“Kawula sampun kabucal saking paningal Paduka.”Ewasamanten nalika kawula sesambat dhumateng Paduka,
Paduka lajeng nyembadani dhateng pasambat kawula.(31-24) He sakehe para kekasihing Pangeran, padha tresnaa marang Sang Yehuwah!
Sang Yehuwah ngreksa para wong kang setya,nanging kang gumunggung
diwales temenan.(31-25) Sakehing wong kang ngarep-arep marang Sang Yehuwah,
padha disantosa lan diteteg atimu!