Jabur 81
Kanggo lurah pasindhen. Miturut lagu: Gitit. Anggitane Asaf.
(81-2) Padha surak-suraka kagem Gusti Allah, kang dadi kasantosan kita,
padha surak-suraka kagem Gusti Allahe Rama Yakub.
(81-3) Padha ngidunga karo trebangan
lan clempungan, kang laras binarung swaraning slukat.
(81-4) Ngunekna kalasangka ing tanggal sapisan,
ing tanggal purnama ing dina riyaya kita.
(81-5) Amarga bab iku dadi pranatan tumrap bangsa Israel,
sarta dadi angger-angger saka Gusti Allahe Rama Yakub.
(81-6) Kang pinacak dadi pepakon marang Rama Yusuf,
nalika Gusti Allah miyos nglurugi tanah Mesir.
(81-7) “Pundhake wus Sunuwalake saka anggone memikul,
sarta tangane saka ing kranjanging pikulan;
(81-8) sajroning karubedan sira padha sesambat, Ingsun banjur ngentasake sira,
Ingsun nyembadani panyuwunira saka ing pasingidaning gludhug,
Ingsun wus nyoba marang sira ana ing sacedhake banyu Meriba. (Selah)(81-9) He para umatingSun padha ngrungokna, Ingsun arsa paring pepenget marang sira;
he Israel, manawa sira gelem ngrungokake marang dhawuhingSun.
(81-10) Ing tengahira aja ana allah liyane,
sira aja sujud marang allah ngamanca.
(81-11) Iya Ingsun iki Yehuwah Allahira,
kang ngluwari sira saka ing tanah Mesir,
cangkemira angapna kang amba, nuli bakal Sunkebaki.(81-12) Nanging umatingSun ora ngrungokake marang swaraningSun,
sarta Israel ora seneng marang Ingsun.
(81-13) Mulane banjur Suntogake atine kang wangkot iku,
cikben padha nglakoni sakarepe dhewe.
(81-14) Ah, saupama umatingSun ngrungokake marang dhawuhingSun,
saupama Israel ngambah ing dalan pitedahingSun.
(81-15) Sanalika iku uga mungsuhe mesthi Suntelukake,
sarta mungsuhe padha ngrasakake antebing astaningSun.
(81-16) Para wong kang sengit marang Pangeran Yehuwah, bakal nyembah ndilat sampeyane,
lan iki wis dadi nasibe ing salawas-lawase.
(81-17) Nanging umatingSun bakal Sunparingi mangan gandum kang becik dhewe
malah bakal padha Sunwaregi kalawan madu saka ing parang.”