Hakim-hakim 1

Sanggeus Yosua pupus, urang Israil naros ka PANGERAN, "Kaom mana heula anu kedah majeng ti payun, merangan urang Kanaan?"

PANGERAN ngawaler, "Kaom Yuda heula. Eta tanah ku Kami geus ditangtukeun keur maranehna."

Ceuk kaom Yuda ka kaom Simeon, "Bantuan kuring merangan urang Kanaan, ngarebut tanah anu ditangtukeun pikeun kuring. Engke aranjeun dibantuan ngarebut tanah anu ditangtukeun pikeun aranjeun." Seug kaom Simeon

arindit perang mantuan kaom Yuda. Ku pitulungna PANGERAN perangna unggul, urang Kanaan jeung urang Pares kadeseh, baladna kasambut sapuluh rebu di Besek.

Rajana, Adonibesek, kapanggih tuluy diperangan.

Eta raja kabur, tapi diudag sarta kacerek. Tuluy indung leungeun jeung indung sukuna dibuntungan.

Adonibesek ngarahuh, "Tujuh puluh raja nu dibuntungan indung leungeun jeung indung sukuna, marulungan remeh di kolong meja aing. Kalakuan aing kitu ka maranehna ayeuna dibales ku PANGERAN." Adonibesek dibawa ka Yerusalem sarta paeh di dinya.

Balad Yuda merangan Yerusalem. Yerusalem karebut. Jelemana diparaehan, kotana dihuru.

Ti dinya balad Yuda merangan urang Kanaan anu di pagunungan, anu di suku-suku gunung, jeung anu di tanah gundul di kidul.

Ti dinya maju deui merangan urang Kanaan anu di kota Hebron anu katelahna Kiryat Arba. Di dinya maranehanana ngelehkeun urang Sesai, Ahiman jeung Talmai.

Geus kitu balad Yuda maju ka kota Debir, harita mah disebutna Kiryat Seper.

Pok Kaleb ngomong kieu, "Nu bisa ngarebut Kiryat Seper, rek dikawinkeun ka anak Bapa, Nyi Aksa."

Otniel, alo Kaleb, anak Kenas, hasil ngarebut eta kota. Seug ku Kaleb dikawinkeun ka anakna, Nyi Aksa.

Dina poean nikahna, Nyi Aksa ku Otniel diolo sina menta lahan ka bapana. Nyi Aksa turun tina tonggong kalde, ku Kaleb ditanya kahayangna.

Ari tembalna, "Hoyong gaduh tanah anu aya sumber caina. Tanah paparin ti Bapa anu ti payun mah garing." Ku Kaleb ditedunan dibere lahan di beulah girang jeung beulah hilir nu aya sumber caina.

Geus kitu urang Keni, turunan mertua Musa, arindit jeung urang Yuda ti Yeriho, kota tangkal korma, ka hiji kota keri kiduleun Arad di wewengkon Yuda. Seug maratuh di dinya reujeung urang Amalek.

Kaom Yuda maju jeung kaom Simeon ngelehkeun urang Kanaan anu di kota Sepat. Eta kota ku maranehna disapa, diburak-barik, tuluy dingaranan Horma.

Ku pitulungna PANGERAN, urang Yuda geus bisa ngarebut eta kota pagunungan. Tapi kota Gasa jeung Askelon atawa Ekron, anu perenahna di sapanjang basisir, jeung desa-desa sakurilingna, henteu karebut. Urang Yuda teu bisaeun ngusir pribumina, sabab barogaeun kareta perang tina beusi.

(1:18)

Sakumaha anu geus diparentahkeun ku Musa, Hebron diselehkeun ka Kaleb anu geus ngusir tilu golongan kaom turunan Enak ti eta kota.

Tapi kaom Binyamin henteu ngusir urang Yebus anu caricing di Yerusalem. Urang Yebus tetep caricing di dinya jeung urang Binyamin nepi ka ayeuna.

Kaom Epraim jeung Menase maju merangan kota Betel anu harita ngaranna Lus. Perangna dibantu ku PANGERAN. Maranehanana ngirim mata-mata ka ditu.

(1:22)

Aya jelema anu kaluar ti jero kota, ku mata-mata dibawa ngomong, pokna, "Kami tuduhan sangkan bisa asup ka kota, engke maneh moal dikua-kieu."

Seug ku eta jelema dituduhan. Urang kota eta ku kaom Epraim jeung Menase ditumpes, iwal ti eta jelema katut sakulawargana.

Eta jelema satuluyna indit ka tanah Het. Di dituna nyieun kota, dingaranan Lus, nu tetep ngaranna kitu nepi ka ayeuna.

Urang pribumi anu henteu diusir ku kaom Menase, nya eta anu di kota-kota Bet San, Taanak, Dor, Yiblam. Megido, katut desa-desa anu darareukeut. Eta urang Kanaan teh tetep di darinya.

Sanggeus urang Israil tambah kuat, eta urang Kanaan teh tetep henteu diusir, tapi digarawekeun kalawan paksa.

Anu teu diusir ku kaom Epraim nya eta urang Kanaan anu araya di kota Geser. Maranehna maratuh keneh di dinya jeung kaom Epraim.

Anu henteu diusir ku kaom Sebulun, nya eta anu caricing di kota-kota Kitron jeung Nahalol. Jadi urang Kanaan di dinya mah tetep di darinya, tapi digarawekeun kalawan paksa.

Anu henteu diusir ku kaom Aser, nya eta anu caricing di kota-kota Ako, Sidon, Ahlab, Aksib, Helba, Apek jeung Rehob.

Jadi kaom Aser reureujeungan jeung urang Kanaan di dinya anu teu diusir.

Anu teu diusir ku kaom Naptali, nya eta anu caricing di kota-kota Bet Semes jeung Bet Anat. Urang Kanaan di dinya bareng reujeung kaom Naptali, tapi digarawekeun kalawan paksa.

Ari kaom Dan, ku urang Emor disedekkeun ka kota pagunungan, nepi ka teu barisaeun turun deui ka tanah padataran.

Urang Emor tetep nyaricingan kota-kota Ayalon, Saalabim jeung Gunung Heres. Tapi maranehna aya di bawah kakawasaan kaom Epraim jeung Menase, sarta digarawekeun kalawan paksa.

Ari tanah urang Edom, mimiti ti Sela kaler terus nepi ka sapanjang Akrabim.