Kajadian 35
Allah ngandika ka Yakub, "Maneh kudu pindah ka Betel, urut maneh nyieun altar keur ka Allah, anu nembongan basa maneh kabur nyingkiran dulur maneh Esau."
Ti dinya Yakub marentahkeun kulawargina jeung sakabeh jelema anu caricing di anjeunna, saurna, "Kumpulkeun sagala patung anu ku maraneh sok dipiallah. Terus maraneh marandi, salin ku nu bersih.
Urang pindah ti dieu ka Betel, tempat kami bareto ngadegkeun altar paranti ngabakti ka Allah, anu geus nulung kami mangsa keur kabalangsak, jeung teu kendat-kendat nyarengan boh di mana, boh di mendi."
Tuluy patung-patung sesembahan teh diserenkeun ka Yakub, kitu deui masing-masing papaes ceuli. Ari ku anjeunna terus dikubur di handapeun tangkal kiara anu pernahna deukeut ka Sekem tea.
Yakub sapala putra enggeus leut ngaleugeudeut seja ngalih. Kota-kota sakuriling eta pada ngarasa gimir, nu matak caricing bae teu daek ngudag.
Aleutan Yakub geus cunduk ka nagri Lus, anu ayeuna mah disebutna teh Betel, di tanah Kanaan.
Anjeunna ngadegkeun altar di dinya, sarta tempatna dingaranan El-Betel, hartina Allah anu disembah di kota Betel. Dumeh keur basa anjeunna kabur nyingkahan saderekna tea, Allah nembongan ka anjeunna di dinya.
Geus kitu Debora, emban Rabeka, maot, dikuburkeun di landeuheun tangkal kiara di Betel, sarta tempatna dingaranan "Kiara Panyeungceurikan", ayana kiduleun Betel.
Basa Yakub mulang ti Mesopotami tea, Allah nembongan deui ka anjeunna sarta maparin berkah.
Pangandika-Na harita ka anjeunna, "Ngaran maneh Yakub. Tapi ti semet ieu ngaran maneh teh Israil." Nya ti harita jenenganana teh Israil.
Kieu deui pangandika-Na ka anjeunna, "Kami, Allah Nu Maha Kawasa. Maneh sing reuay anak. Maneh baris loba turunan, aya nu baris jaradi raja. Turunan maneh baris mangpirang-pirang lobana, baris jadi bangsa.
Tanah anu ku Kami dibikeun ka Ibrahim jeung Ishak, ka maneh oge, nya kitu deui ka turunan maneh, rek dibikeun."
Sanggeus ngandika kitu, Allah ngantunkeun Yakub.
Ti dinya Yakub nangtungkeun hiji batu keur pangeling-eling, tuluy ditahbiskeun, dikucuran anggur jeung minyak jetun.
Nya tempatna ku anjeunna dingaranan Betel.
Ti Betel leut deui ngaleut. Sanggeus lalampahanana kira-kira sajongjonan deui ka nagri Eprata, Rahel babar. Babarna hese beleke.
Dina keur meumeujeuhna nyeri, parajina ngalilipur kieu, "Kedah sabar. Murangkalihna pameget deui."
Tapi Rahel geus taya harepan. Memeh cekleuk panungtungan kabujeng keneh maparin ngaran ka murangkalih, Ben Oni. Tapi ku ramana dingaranan Binyamin.
Sanggeus Rahel pupus, dikurebkeunana di sisi jalan ka Eprata, anu ayeuna mah disebutna teh Betlehem.
Kuburanana ku Yakub diberean tutunggul. Eta tutunggul kuburan Rahel aya tepi ka kiwari.
Ti dinya Yakub maju deui, deg ngadegkeun pasanggrahan di hiji tempat anu paeunteung-eunteung jeung munara Eder.
Waktu Israil matuh di eta tanah, Rubin jinah jeung salah sahiji parekan ramana nu ngaranna Bilha. Sanggeus kauninga, Yakub pohara benduna. Putra-putra Yakub kabehna dua belas.
Anu ti Lea: Rubin, cikalna, terus: Simeon, Lewi, Yuda, Isaskar jeung Sebulun.
Putra ti Rahel: Yusup jeung Binyamin.
Putra ti emban Rahel nu ngaranna Bilha: Dan jeung Naptali.
Putra ti Silpa emban Lea: Gad jeung Aser. Eta putra-putrana nu pameget anu dilahirkeun di Mesopotami.
Yakub sumping ka Ishak ramana di Mamre, deukeut Hebron, panglinggihan Ibrahim jeung Ishak bareto.
Ishak pupus dina yuswa 180 taun.
Anjeunna pupus dina yuswa geus kacida sepuhna. Dikurebkeunana ku Esau jeung Yakub, putrana.